मुख्यमंत्री श्री बघेल ले जिला पंचायत अध्यक्ष मन के प्रतिनिधि मण्डल ह करिस सौजन्य मुलाकात

रायपुर, मुख्यमंत्री श्री भूपेश बघेल ले आज इहां विधानसभा परिसर स्थित ऊंखर कार्यालय कक्ष म जिला पंचायत अध्यक्ष मन के प्रतिनिधि मण्डल ह सौजन्य मुलाकात करिस। उमन वित्तीय साल 2022-23 के बजट म जिला पंचायत, जनपद पंचायत अउ ग्राम पंचायत के पदाधिकारी मन के मानदेय म बढ़ोतरी अऊ जिला पंचायत विकास निधि अऊ जनपद पंचायत विकास निधि योजना के प्रावधान बर मुख्यमंत्री के प्रति आभार प्रकट करिन।
जानबा हे कि बजट म जिला पंचायत अध्यक्ष मन के मानदेय 15 हजार रूपिया ले बढ़ाके 25 हजार, जिला पंचायत उपाध्यक्ष मन के मानदेय 10 हजार ले बढ़ाके 15 हजार रूपिया अऊ जिला पंचायत सदस्य मन के मानदेय 6 हजार रूपिया ले बढ़ाके 10 हजार रूपिया प्रतिमाह करे गए हे। अइसनहे जनपद पंचायत अध्यक्ष मन के मानदेय 6 हजार ले बढ़ाके 10 हजार रूपिया, जनपद पंचायत उपाध्यक्ष मन के मानदेय 4 हजार ले बढ़ाके 6 हजार रूपिया अउ जनपद पंचायत सदस्य मन के मानदेय 1500 रूपिया ले बढ़ाके 5 हजार रूपिया अऊ सरपंच मन के भत्ता 2 हजार ले बढ़ाके 4 हजार रूपिया अउ पंच मन के भत्ता 200 रूपिया ले बढ़ाके 500 रूपिया प्रतिमाह करे गए हे।
अइसनहे बजट म जिला पंचायत अध्यक्ष मन बर 15 लाख रूपिया, उपाध्यक्ष मन बर 10 लाख रूपिया अउ सदस्य मन बर 4 लाख रूपिया प्रतिवर्ष के मान ले जिला पंचायत विकास निधि योजना म 22 करोड़ रूपिया के प्रावधान करे गए हे। बजट म जनपद पंचायत अध्यक्ष मन बर 5 लाख रूपिया, उपाध्यक्ष मन बर 3 लाख रूपिया अउ सदस्य मन बर 2 लाख रूपिया प्रतिवर्ष के मान ले जनपद पंचायत विकास निधि योजना म 66 करोड़ रूपिया के प्रावधान करे गए हे।
जिला पंचायत अध्यक्ष मन के प्रतिनिधि मंडल म श्रीमती अनीता चन्द्रा, जांजगीर, श्रीमती उषा पटेल, महासमुंद, श्रीमती लेखमी सोनू चंद्राकर, मुंगेली, श्रीमती सोना देशलहरा, बालोद, श्रीमती शशीकला कंवर, कोरबा, श्रीमती कांती सोनवानी, धमतरी, श्री राकेश वर्मा, बलौदाबाजार, श्री अरूण सिंह चौहान, बिलासपुर, श्री सोनू चंद्राकर, मुंगेली, श्री छत्रपाल सिंह कंवर, कोरबा, श्री यशवंत चन्द्रा,जांजगीर संग श्री मान सिंह देशलहरा अऊ आन जनप्रतिनिधि सामिल रहिन।