ग्राम सांकरा म इही शैक्षणिक सत्र म चालू होही उद्यानिकी अऊ वानिकी महाविद्यालय

कुलपति डॉ. एस.एस. सेंगर ह प्रगति के लीन जायजा
दुर्ग, इंदिरा गांधी कृषि विश्वविद्यालय, रायपुर के कुलपति डॉ. एस.एस. सेंगर ह आज दुर्ग जिला के ग्राम सांकरा म स्थापित होए वाले महात्मा गांधी उद्यानिकी विश्वविद्यालय अऊ ग्राम सांकरा म ही स्थापित होवइया उद्यानिकी महाविद्यालय अऊ वानिकी महाविद्यालय के प्रगति के जायजा लीन। जानबा हे कि छत्तीसगढ शासन कोति ले दुर्ग जिला के पाटन विकासखण्ड के ग्राम सांकरा म उद्यानिकी विश्वविद्यालय, उद्यानिकी महाविद्यालय अऊ वानिकी महाविद्यालय शुरू करे के निर्णय ले गए हे। ग्राम सांकरा म चालू शैक्षणिक सत्र ले ही उद्यानिकी महाविद्यालय अऊ वानिकी महाविद्यालय चालू करे जाना हे। इही कड़ी म इंदिरा गांधी कृषि विश्वविद्यालय, रायपुर के कुलपति डॉ.एस.एस. सेंगर ह उद्यानिकी विश्वविद्यालय निर्माण स्थल के अवलोकन करिन।
उद्यानिकी विश्वविद्यालय के विशेष कर्त्तव्यस्थ अधिकारी अऊ कृषि महाविद्यालय मर्रा के अधिष्ठाता डॉ. अजय वर्मा ह ओ मन ल जानकारी दीन कि उद्यानिकी महाविद्यालय अऊ वानिकी महाविद्यालय शुरू करे बर पूर्व माघ्यमिक विद्यालय सांकरा ह अस्थायी व्यवस्था करे जात हे। डॉ. सेंगर ह पूर्व माध्यमिक विद्यालय भवन के निरीक्षण कर उहां दुनों महाविद्यालय चालू करे बर जरूरी व्यवस्था करे के निर्देश दीन। उमन उद्यानिकी विश्वविद्यालय भवन के निर्माण घलोक जल्द शुरू करे के निर्देश दीन। ये बेरा म कृषि महाविद्यालय, रायपुर के अधिष्ठाता, डॉ. एम.पी. ठाकुर घलोक उपस्थित रहिन।