फल-फूल, सब्जी अऊ मसाला के खेती करइया मन ल मिलही इनपुट सब्सिडी
रैपुर, छत्तीसगढ़ सरकार कोति ले राज्य म फसल उत्पादकता अऊ फसल विविधीकरण ल बढ़ावा देहे के उद्देश्य ले संचालित राजीव गांधी किसान न्याय योजना के दायरा म अब खरीफ सीजन के उद्यानिकी फसल मन ल घलोक सामिल कर ले गए हे। राज्य म खरीफ मौसम म फल-फूल, सब्जी अऊ मसाला के खेती करइया किसान मन ल योजना के प्रावधान के तहत प्रति एकड़ के मान ले 9 हजार रूपिया के आदान सहायता राशि (इनपुट सब्सिडी) मिलही। जानबा हे कि खरीफ सीजन 2020 म धान के खेती वाले रकबा म कहूं उद्यानिकी फसल मन के खेती चालू खरीफ सीजन म करे जाही त प्रति एकड़ 10 हजार रूपिया इनपुट सब्सिडी देहे के प्रावधान राजीव गांधी किसान न्याय योजना के तहत करे गए हे।
आप मन जानतेच हव कि राजीव गांधी किसान न्याय योजना के तहत पहिलिच खरीफ सीजन 2021-22 म धान, गन्ना, मक्का, अरहर, सोयाबीन, दलहन-तिलहन के उत्पादक किसान मन ल इनपुट सब्सिडी देहे के प्रावधान करे गए रहिस। बाद म ये योजना के प्रावधान ल संशोधित करके वोमें कोदो, कुटकी अऊ रागी ल घलोक सामिल कर ले गीस। अभी हाल म बीते 8 सितमबर के मुख्यमंत्री श्री भूपेश बघेल के अध्यक्षता म आयोजित केबिनेट के बैठक म खरीफ साल 2021-22 ले खरीफ के सबो फसल मन ल सामिल करे के निर्णय ले गीस, जेखर तहत उद्यानिकी फसल मन के उत्पादक किसान मन ल प्रति साल 9 हजार रूपिया प्रति एकड़ के दर ले आदान सहायता देहे के प्रावधान करे गए हे।
