उद्यानिकी विभाग के योजना मन ले खेती करके बनिस सफल किसान

मुंगेली, मेहनत, लगन अऊ सही मार्गदर्शन ले कोनो भी लक्ष्य ल पाए जा सकत हे। मुंगेली जिला के पथरिया विकासखंड अंतर्गत ग्राम कलार-जेवरा के किसान नरेन्द्र राजपूत ह एला सच कर देखाए हे। उद्यानिकी विभाग के कई ठन योजना मन के लाभ उठाके वो ह पारंपरिक खेती के संग उद्यानिकी फसल मन के उत्पादन चालू करिस अऊ आज ओ ह अपन मेहनत ले हर बछर 20 ले 22 लाख रूपिया के कमई करत हे।
राजपूत ह साल 2016 ले ही किसानी काम के संग उद्यानिकी फसल मन के खेती सुरू करिस। वो ह उद्यानिकी विभाग के राज्य पोषित योजना मन के अंतर्गत सामुदायिक फेसिंग, ड्रीप सिसटम, संरक्षित खेती अऊ सूक्ष्म सिंचाई जइसे आधुनिक तकनीक मन ल अपनाके सब्जी उत्पादन म उल्लेखनीय सफलता प्राप्त करिस। एखर से वोखर आय म बढ़ोतरी होइस, संगेच परिवार ल आर्थिक रूप ले मजबूती घलोक मिलीस। अभी हाल म ओ ह टमाटर(पताल), बैंगन(भांटा) संग कई ठन साग-भाजी के उत्पादन करके स्थानीय बाजार म बेंचत हे। राजपूत के कहना हे के सरकारी योजना मन के समय म लाभ लेहे अऊ वैज्ञानिक पद्धति ले खेती करे ले ही किसान मन के आय म बढ़ोतरी संभव हे। ओ ह आन किसान मन ल घलोक प्रेरित करत हे के ओ मन उद्यानिकी विभाग के योजना मन के लाभ उठाके अपन आर्थिक स्थिति ल सुदृढ़ बनावंय। राजपूत के सफलता ए बात के प्रमाण हे के कहूं किसान नवा तकनीक अऊ शासकीय योजना मन के सही दिशा म उपयोग करहीं त खेती ह आजीविका के सशक्त साधन बने के संगें संग आर्थिक आत्मनिर्भरता के मार्ग घलोक प्रशस्त कर सकत हे।