केन्द्रीय कृषि मंत्रालय ह बागवानी क्षेत्र बर आवंटित करिस 2250 करोड़ रुपिया
दिल्ली, 11 मई 2021। किसान मन के आय म बढ़ोतरी खातिर बागवानी क्षेत्र के भूमिका अऊ वोकर संभावना मन ल ध्यान म रखत, भारत सरकार ह साल 2021-22 म बागवानी क्षेत्र के विकास बर 2250 करोड़ रूपिया आवंटित करे हे।
देशभर म बागवानी क्षेत्र के बने सहिन विकास अऊ एला बढ़ावा देहे बर ये आवंटन केन्द्र सरकार कोति ले समर्थित ‘मिशन फॉर इंटिग्रेटेड डेवलपमेंट ऑफ हॉर्टिकल्चर (एमआईडीएच)’ योजना के अंतर्गत करे गए हे। फल, साग-भाजी, जरी अऊ कांदा फसल, मशरूम, मसाला, फूल, सुगंधित पौधा, नरियर, काजू आदि फसल वाले बागवानी क्षेत्र म मौजूद संभावना मन ल साकार करे बर कृषि मंत्रालय एमआईडीएच योजना ल ये साल सरलग कार्यान्वित करत हे। ये क्षेत्र के आवंटन पाछू साल के तुलना म काफी जादा हे। वार्षिक कार्य योजना बनाए बर राज्य/ केन्द्र शासित प्रदेश मन ल ये आवंटन के जानकारी देहे गए हे।
जानबा हे के बागवानी क्षेत्र ल सरकार के पंदोली देहे के सेती आज देश म बागवानी क्षेत्र के उत्पादन कृषि उत्पादन ले आगू निकल गए हे। देश म साल 2019-20 म 25.66 मिलियन हैक्टेयर जमीन म बागवानी खेती होए हे तेमा अब तक के सर्वाधिक 320.77 मिलियन टन उत्पादन होए हे। साल 2020-21 के पहिली अनुमान के मुताबिक देश म 27.17 लाख हेक्टेयर जमीन म बागवानी क्षेत्र के कुल उत्पादन 326.58 लाख मीट्रिक टन रहे के अनुमान हे।
