रायपुर, हुनर ले रोजगार कार्यक्रम म युवा मन ल होटल प्रबंधन ले संबंधित प्रशिक्षण बर अब 10 दिसम्बर 2019 तक आवेदन लेहे जाही। पहिली एखर बर आवेदन करे के आखरी तारीक 20 नवम्बर निरधारित रहिस।
छत्तीसगढ़ टूरिज्म बोर्ड कोति ले दिए जात ये प्रशिक्षण म युवा मन ल फ्रंट ऑफिस एसोसिएट, हाऊस कींपिंग, रूम अटेंड बर आयु सीमा 18 साल निरधारित करे गए हे। फ्रंट ऑफिस एसोसिएट बर शैक्षणिक योग्यता 12वीं अऊ रूम अटेंड बर 5वीं निरधारित करे गए हे। आवेदन पत्र के प्रारूप नियम अऊ शर्त के जानकारी बर विभागीय वेबसाईट www.tourism.cg.gov.in के संगेच छत्तीसगढ़ टूरिज्म बोर्ड रायपुर के कार्यालय अऊ होटल प्रबंधन संस्थान नवा रायपुर ले संपर्क करे जा सकत हे।
चयनित उम्मीदवार मन ल होटल प्रबंधन संस्थान, उपरवार, नवा रायपुर म प्रशिक्षण देहे जाही। प्रशिक्षण पूरा करे म ओ मन ल पाठ्यक्रम के मुताबिक नियमानुसार वजीफा देहे जाही। प्रशिक्षण के समय उम्मीदवार मन ल रहे अउ भोजन के निःशुल्क व्यवस्था रइही। प्रशिक्षण के बाद ए मन ल संबंधित संस्थान मन म रोजगार के अवसर मिल सकही।
हम आप ल बता देवन के भारत सरकार, पर्यटन मंत्रालय, नई दिल्ली कोति ले प्रायोजित प्रशिक्षण कार्यक्रम हॉस्पिटैलिटी अउ होटल प्रबंधन ले जुड़े काम मन म युवा मन ल रोजगार देवाए बर हुनर ले रोजगार के कार्यक्रम चलाए जात हे। प्रशिक्षण के संबंध म पूरा जानकारी दूरभाष नम्बर 0771-2972411 अउ ई-मेल hsrtraipur@gmail.com ले घलोक लेहे जा सकत हे।
