कांकेर, स्वामी आत्मानंद इंग्लिश मीडियम स्कूल मन ह शिक्षा के गुणवत्ता ल लेके बड़का मुकाम हासिल करे हे। एखर से प्रदेश म गुणवत्तायुक्त शिक्षा के नवा स्तर कायम होए हे। एकर विचार कइसे आइस, एला मुख्यमंत्री श्री भूपेश बघेल ह कांकेर के शासकीय नरहरदेव उत्कृष्ट उच्चतर माध्यमिक शाला म आयोजित समर कैंप म साझा करिन। उमन बताइन कि कोरोना काल म सब जगा लॉकडाउन रहिस। मैं ह अधिकारी मन के मीटिंग लेंव अऊ कहेंव कि छत्तीसगढ़ 20 साल ले अस्तित्व म हे फेर अइसन एको स्कूल आप मन नइ बना पायेव जेमां आप मन के लइका पढ़ सकयं। फेर स्वामी आत्मानंद इंग्लिश मीडियम स्कूल के विचार आइस। सबले अच्छा प्राइवेट स्कूल जइस शिक्षा हमार लइका मन ल घलोक मिलय, एखर बर स्कूल सुरू करे गीस। नाम रखे गीस स्वामी आत्मानंद के नाम म जेमन अबुझमाड़ म आदिवासी लइका मन बर शिक्षा के अतका अच्छा काम करिन।
उमन कहिन कि पहिली रायपुर म 3 स्कूल खोलेन, फेर प्रदेश म 52 अऊ अब 172 स्कूल हे। जिहां जाथंव स्वामी आत्मानंद इंग्लिश मीडियम स्कूल के माँग होथे। भेंट मुलाकात म मैं जनता के माँग म एकर घोषणा घलोक करत हंव।
समर कैंप म मुख्यमंत्री ह लइका मन के आग्रह म भौंरा घलोक चलाइन। भौंरा के कील ल देखके मुख्यमंत्री ह कहिन कि एला ठीक करा लेवव, भौंरा अऊ बढ़िया चलही। लइका मन के बनाय कलाकृति मन के अवलोकन घलोक मुख्यमंत्री ह करिन। चर्चा म मुख्यमंत्री ह कहिन कि कांकेर म साढ़े तीन साल म बड़का बदलाव होए हे। अतीक सब्बो विकास के काम होए हे कि सबो ल देख पाय बर समय नइ हे। बहुत अच्छा लागत हे। कांकेर तेजी ले विकास करत हे। मुख्यमंत्री ह कहिन कि ये स्कूल म मैं दुसरा बार आए हंव। बहुत सुखद बदलाव ये बीच होए हे। पूरा स्कूल के टीम एखर बर बधाई के पात्र हें।
जब मुख्यमंत्री ह बताइस कइसे आइस स्वामी आत्मानंद इंग्लिश मीडियम स्कूल के विचार
