- नोनी सशक्तीकरण सहायता योजना, अब पंजीकृत श्रमिक मन के बेटी मन के खाता म आही 20-20 हजार रूपिया
- मजदूर परिवार के पहली दू बेटी मन ल राज्य सरकार ये योजना म देही 20-20 हजार रूपिया
रायपुर, छत्तीसगढ़ म अब मजदूर परिवार के पहली दू बेटी मन ल उंखर शिक्षा, रोजगार अऊ बिहाव बर 20-20 हजार रूपिया के सहायता राशि राज्य सरकार देही। मुख्यमंत्री श्री भूपेश बघेल ह ये घोषणा गणतंत्र दिवस के मौका म करे हें। ये योजना म आवेदन करे बर आवेदक श्रमिक ल छत्तीसगढ़ के स्थायी निवासी अऊ छत्तीसगढ़ भवन अउ आन संन्निर्माण कर्मकार कल्याण मंडल म पंजीकृत होना जरूरी हे।
जानबा हे कि मुख्यमंत्री श्री भूपेश बघेल के अगुवाई म राज्य सरकार ह प्रदेश के महिला मन के अधिकार मन के रक्षा, उंखर शिक्षा, सेहत, स्वावलंबन अऊ आत्मसम्मान बर बहुत अकन ठोस कदम उठाए हे। सरकारी योजना अऊ आर्थिक नवोन्मेष ले महिला मन ल जोड़े अऊ ओ मन ल आत्मनिर्भर बनाए के पहल तब ले सरलग चलत हे। नोनी सशक्तीकरण सहायता योजना अइसनहे आगू बढ़त कदम ये। जेमां पात्र हितग्राही श्रमिक के पहली दू वयस्क अऊ अविवाहित बेटी मन ल 20-20 हजार रूपिया के प्रोत्साहन राशि छत्तीसगढ़ सरकार देही।
ये प्रोत्साहन राशि पात्र हितग्राही के बेटी मन के बैंक खाता एकमुश्त भेजे जाही, एखर खातिर आवेदक के बैंक खाता अऊ मोबाइल नंबर होना जरूरी हे। ये राशि के उपयोग बेटी मन के शिक्षा, रोजगार, कौशल उन्नयन, स्व-रोजगार, स्वावलंबन अऊ ऊंखर बिहाव बर घलोक करे जा सकही। पात्र हितग्राही मन म लड़की के माता-पिता म ले एक या दुनों कम से कम एक साल पहिली ले श्रमिक मंडल म वैध रूप ले पंजीकृत होना चाही। ये योजना म आश्रित पुत्री, जेखर बर आवेदन करे जाही वो कोनो आन विभाग म या बीओसी मंडल के पंजीकृत हितग्राही नइ होना चाही।
नोनी सशक्तीकरण सहायता योजना के अंतर्गत जिला श्रम कार्यालय म श्रम निरीक्षक, श्रम उपनिरीक्षक कोति ले आवेदन सत्यापन के बाद सहायक श्रम आयुक्त, श्रम अधिकारी या सहायक श्रम पदाधिकारी मन तीर नियमानुरूप आवेदन जमा कर सकहीं। एकर बाद राज्य सरकार पंजीकृत मजदूर के अविवाहित दू बेटी मन ल 20-20 हज़ार रूपिया के सहायता राशि देही। जानबा हे कि छत्तीसगढ़ भवन अउ आन सन्निर्माण कर्मकार कल्याण मंडल म पंजीकृत हितग्राही मन ल ये योजना के लाभ मिलही। ये योजना के क्रियान्वयन बर आवेदन प्रक्रिया जल्दीच शुरू करे जाही।
