जनदर्शन होइस चालू: मुख्यमंत्री श्री साय मयारू कस मिलिन नागरिक मन ले

रायपुर, 27 जून 2024। मुख्यमंत्री निवास कार्यालय म जनदर्शन कार्यक्रम आज शुरू होइस। मुख्यमंत्री श्री साय प्रदेश के अलग-अलग जगा ले आए नागरिक मन ले मयारू कस मिलिन। उंखर समस्या मन ल पूरा संवेदनशीलता के संग सुनिन अऊ उंखर समस्या मन के निराकरण बर अधिकारी मन ल जरूरी दिशा-निर्देश घलोक दीन।
मुख्यमंत्री ह जनदर्शन कार्यक्रम ल सम्बोधित करत कहिन कि हमर सरकार ल छै महीना होए हे। हम सरलग मनखे मन ले मिलके उंखर समस्या हल करे के उदीम करत हन। पहिली घलोक मुख्यमंत्री डॉक्टर रमन सिंह के समय मुख्यमंत्री मनखे मन ले जनदर्शन म मिलत रहिन। हम हर बिरसपत के आप मन ले मिलबो अऊ आप मन के समस्या के समाधान के दिशा म काम करबो। उमन कहिन कि जनदर्शन कार्यक्रम म अवइया नागरिक मन ल टोकन दे जाही। आप मन के आवेदन मन ल दर्ज करे जाही अऊ कारवाई करे जाही। आप मन सबो के हृदय ले अभिनंदन हे।