मुंगेली, 13 मई 2024। जिला के खुड़िया क्षेत्र म पदस्थ डिप्टी रेंजर वाला विवाद थमे के नाम नइ लेवत हे। अब ए मामला म सर्व आदिवासी समाज ह कार्रवाई उपर सवाल उठात मोर्चा खोल देहे हे। दरअसल बीते महीना पहिली भूतकछार सर्किल के जंगल के कक्ष नंबर 486 म करंट तार के चपेट म आए ले हाथी के मौत हो गए रहिस। ए मामला म 9 आरोपी मन के खिलाफ डिप्टी रेंजर प्रबल दुबे के अगुवई म कार्रवाई करत एफआईआर दर्ज करे गए हे। एमां तीन आरोपी मन ल जेल घलोक दाखिल करे गए हे।
जानबा हे कि बीते 4 मई के ग्राम सरगढ़ी के विसंभर सिंह ल वन विभाग के टीम ह गिरफ्तार करे रहिस, जेन ल कस्टडी म डिप्टी रेंजर ह मारपीट करे हे अइसे गंभीर आरोप हे। गिरफ्तार युवक के शरीर के पिछले हिस्सा म चोट के गंभीर निशान दिखाई देवत हे। एकर वीडियो घलोक सोशल मीडिया म जमके वायरल होवत हे। आदिवासी समाज के मनखे मन ह डेढ़ महिना म पहिली विभाग के चौकीदार भादुराम कोलाम के शिकायत म डिप्टी रेंजर के खिलाफ एट्रोसिटी के तहत एफआईआर दर्ज कराए रहिन। वोखर खिलाफ निलंबन संग वोखर गिरफ्तारी के मांग ल लेके सलग शिकायत करे गीस, फेर ओ शिकायत मन म कोनो कार्रवाई नइ करे गीीीस। एखर चलते दू दिन पहिली डिप्टी रेंजर ले नाराज गांव वाले मन ह जंगल म डिप्टी रेंजर के जमके पिटाई कर दीन। ए घटना के सूचना म डिप्टी रेंजर दुबे ल पुलिस के मदद ले 50 बिस्तर अस्पताल लाए गीस, जिहां म प्राथमिक उपचार के बाद ओ मन ल जेल दाखिल कर दे गीस। संगेच डिप्टी रेंजर प्रबल दुबे के शिकायत म तीन गांव वाले मन के खिलाफ नामजद संग आन आरोपी मन के खिलाफ मारपीट करे अऊ शासकीय काम म बाधा डाले के आरोप म एफआईआर दर्ज करे गए हे।
