मुंगेली, 20 मार्च 2020। कोरोना वायरस के रूप मे दुनिया म संकट मंडरावत हे अउ कई झन के बेवकूफि खतम नई होत हे। ये वायरस से लड़े के एकमात्र विकल्प आइसोलेशन (मने सार्वजनिक जगा म नइ जाना) हावय, यानी सुरक्षित रहना हे त घर म ही रहयं। एक दूसर के संपर्क म आय ले बचयं। फेर इही दौरान कुछ मनखे जानत-समझत बेवकूफी करत हें। शनिच्चर के अइसनहे तीर्थयात्री मन रतनपुर पहुंच गिन त संक्रमण के डर से उहां हड़कंप मच गिस। रॉयल अउ कर्मा बस सर्विस के टूरिस्ट बस म सैकड़ों के संख्या म लोगन मन राजनांदगांव के भंडार पुर से तीर्थ यात्रा म निकले हावयं। इही बीच ओमन वृंदावन, आगरा इलाहाबाद के भ्रमण करके, उहां ले होत रतनपुर पहुंचे हें।
अइसनहे 15 मार्च के राजिम ले इलाहाबाद बर निकले वृंदावन बस सर्विस के बस ह 38 सवारी मन ल लेके रतनपुर तीर्थाटन बर पहुंचीस, जबकि रतनपुर म एहतियात के तौर म सब्बो मंदिर बंद कर देहे गए हे। पूरा देश हाई अलर्ट म हे अउ कुछ अज्ञानी मन तीर्थ यात्रा के नाम म आके क्षेत्र म घलो संक्रमण फैलाय के कोशिश करत हें, काबर कि ये मन इलाहाबाद आगरा जैसन कुछ इलाका ले आए हें, जिहां संक्रमण फइले हे।
जइसेच प्रशासन ल ये बात के खबर लगिस के उत्तर प्रदेश के भ्रमण करके कुछ पर्यटक हमर क्षेत्र म पहुंचे हें अउ इहां एक तरफ बस रोक के भोजन तैयार करत हें त तुरंते प्रशासन अलर्ट हो गीस। आनन-फानन म पहुंचे पुलिस ह सब्बो ल चेतावनी देत तुरते रतनपुर छोड़े के आदेश दिस।
अइसन समय म सब मनखे मन ल चाही के कोनो प्रकार के यात्रा झन करयं, बाहर झन जायं। घर म समय बितायं अउ जरुरी होय त हॉस्पिटल या बाजार दुकान जाय। कोनो बाहरी मनखे दूसर राज अउ देस से आय ले तुरंत खबर करके जागरूकता के परिचय देवयं।
मुंगेली ले गुरतुर गोठ बर दिलीप बसंत
