रायपुर, 25 अगस्त 2020। राजधानी रायपुर म आज एक सनकी पति ह मामूली विवाद म पत्नी उपर जानलेवा हमला कर दिस. हमला ले पत्नी के गला म गहरा चोट आय हे. लोगन मन के मदद ले ओला अस्पताल म भर्ती कराये गिस. जिहां उंखर इलाज जारी हे. पीड़िता के शिकायत के बाद पुलिस ह आरोपी पति के खिलाफ मामला दर्ज करके गिरफ्तार कर ले हे. मामला पंडरी थाना इलाका के दलदल सिवनी के हे.
पंडरी पुलिस के अनुसार, पीड़िता रानी रजक के जांजगीर निवासी नरेश रजक ले बिहाव होय हे. ये दुनो के एक बच्ची हे. रानी रजक पिछला 8 महिना ले दलदल सिवनी म एक किराया के मकान म पति ले अलग राहत रिहिस. एक महिना पहली बच्ची ल ओखर पति नरेश ह ओखर पास ले लेके चले गे रिहिस. सोमवार के मंझनिया 2 बजे के आस-पास आरोपी ह अपन पत्नी रानी रजक ल अपन संग रहे ल कहिन, लेकिन जब ओखर पत्नी रानी ह ओखर संग रहे ले मना करिन त आवेश म आके वो पेचकस ले ओखर उपर वार कर दिस. हमला ले पीड़िता ल गंभीर चोट आइस. आरोपी नरेश रजक के खिलाफ हत्या के प्रयास के मामला दर्ज करके ओला गिरफ्तार कर ले गे हे.
