रायपुर, 4 नवंबर 2020। रायपुर ले करीब 30 किमी दूर स्थित आरंग म पेड़ म मंगलवार बिहनिया एक युवती के लटकत हुए लाश बरामद होए रिहिस. हत्या के गुत्थी ल आरंग पुलिस ह महज 6 घंटा के भीतर ही सुलझा लिस हे. मृतिका के बैग ले मिले मेडिकल पर्ची के आधार म पुलिस ह छानबीन करत हुए हत्या के आरोपी पति हरवंश धर्मा ल गिरफ्तार करिन हे. मृतिका पत्नी स्पा सेंटर म काम करत रिहिस. जेखर सेती पति अवैध संबंध के आशंका के चलत ओखर ले विवाद करत राहय. इही वजह हे कि आरोपी ह गला दबा के पहली ओखर हत्या कर दीस, फेर शव ल दुप्पटा ले बांध के पेड़ म लटका दीस. जेखर ले ये आत्महत्या लगे.
पुलिस के अनुसार मृतिका के पहचान भूरी उर्फ रीवा धर्मा के रूप म होइस हे, जो कि अपन पति हरवंश धर्मा के संग रायपुर के पुरैना म किराए के मकान म राहत रिहिस. मृतिका भूरी रायपुर के स्पा सेंटर म काम करत रिहिस, ये काम पति हरवंश ल पसंद नइ् रिहिस. जेखर सेती रोज पति-पत्नी के बीच विवाद होवत राहय. इही दौरान सोमवार रात 7.30 बजे दुनों अपन गांव पिरदा जाए बर स्कूटी ले निकले रिहिस, लेकिन रास्ता म ही भूरी ह गांव जाए ले मना कर दीस. दुनों गुल्लू गांव ले वापस आवत रिहिस कि पति हरवंश धर्मा ह पेशाब करे के बहाना ले अमेठी मोड़ म गाड़ी रोक के उतरगे.
एखर बाद मउका देखत ही आरोपी ह अपन पत्नी के गला दबाके हत्या कर दीस, फेर हत्या करे के बाद दुप्पटा ले लाश ल पास के ही बबूल पेड़ म लटका दीस. एखर सूचना मंगलवार बिहनिया अमेठी के कोटवार ह आरंग पुलिस ल दीस. मउका म आरंग पुलिस, फॉरेंसिक, डॉग स्क्वायड, साइबर क्राइम के टीम ह महिला के शव के पंचनामा करके जांच म जुटगे. घटना स्थल म महिला के बैग ले मिले मेडिकल पर्ची के आधार म आरंग पुलिस ह जांच करत हुए महज 6 घंटा के भीतर ही भागे के फिराक म रहे आरोपी पति हरवंश धर्मा ल रसनी म नाकाबंदी करके गिरफ्तार कर लिन. पूछताछ म आरोपी पति हरवंश धर्मा ह अपन जुर्म कबूल कर लिस हे.