सेवा के कहानी : बिहान ले मिलिस नवा उड़ान, हुस्ना परवीन बनिस लखपति दीदी

CHHATTISGARHI NEWS: सूरजपुर, महिला मन ला स्व-सहायता समूह ले जोड़ के आत्मनिर्भर बनाए के पहल ग्रामीण आंचल मन म नवा संभावना खोलत हे। राष्ट्रीय ग्रामीण आजीविका मिशन ‘बिहान’ के सहयोग ले सूरजपुर जिला के विकासखंड भैयाथान अंतर्गत दतिमा गांव के श्रीमती हुस्ना परवीन ह सिलाई के अपन हुनर ला स्वरोजगार के आधार बनाइन। समूह ले मिले सहयोग अउ अपन मेहनत के बल पर ओमन सिलाई के काम ला कपड़ा व्यवसाय तक विस्तार करिन अउ आज परिवार के आर्थिक मजबूती म योगदान देत हें।
श्रीमती हुस्ना परवीन बताथें के ओमन पहिली सिलाई के काम करत रहिन। एखर से होवइया सीमित आय म परिवार के खर्चा चलाए अउ लइका मन के पढ़ई के जरूरत पूरा करना कठिन रहिस। ओमन अपन काम बढ़ाना चाहत रहिन, लेकिन पूंजी के कमी ओखर रस्ता म बाधा रहिस। बिहान के तहत स्व-सहायता समूह ले जुड़े के पाछू ओमन ला करजा लेके व्यवसाय आगे बढ़ाए के अवसर मिलिस।
ओमन समूह के माध्यम ले 30 हजार रूपिया के करजा लेके मैचिंग सेंटर सुरू करिन। काम के संग ओखर अनुभव अउ आत्मविश्वास बढ़िस। आगे चलके ओमन कपड़ा के व्यवसाय घलो सुरू करिन। ए तरा ले सिलाई के हुनर अउ समूह ले मिले आर्थिक सहयोग ह ओखर बर आजीविका के नवा रस्ता बनाइन।
आज श्रीमती हुस्ना अपन व्यवसाय ले आय अर्जित करके परिवार के जिम्मेदारी म हाथ बंटावत हें अउ लइका मन के पढ़ाई के खर्चा घलो उठावत हें। श्रीमती हुस्ना कहिथें के मैं मुख्यमंत्री विष्णु देव साय ला धन्यवाद देत हौं, ओखर सियानी म मोला बिहान समूह ले जुड़े अउ शासन के योजना मन ले मिले सहयोग ह मोला आगे बढ़े के अवसर दीस, जेकर से आज मैं लखपति दीदी बन गए हौं।