नागरिक मन ल विश्वास म लेके काम करे ले खच्चित बने परिणाम आगू आही: श्री बघेल

रायपुर, मुख्यमंत्री श्री भूपेश बघेल नवा रायपुर स्थित एक होटल म आयोजित आईएएस कॉन्क्लेव म सामिल होइन। ये बेरा म उमन कहिन कि आप मन सबो अपन-अपन जगा म बहुत अच्छा काम करत हौ। योजना मन के क्रियान्वयन म आप मन सबो के महत्वपूर्ण भूमिका हे। मुख्यमंत्री ह कहिन कि योजना मन सबो बने होथे फेर ओखर क्रियान्वयन घलोक बेहतर ढंग ले होना चाही। उमन कहिन के मनखे मन ल विश्वास म लेके कोनो काम करे जा सकत हे, विकास योजना मन ल धरातल म क्रियान्वित करे बर मनखे मन के विश्वास जीतना बहुत जरूरी हे। कहूं आप मन नागरिक मन ल विश्वास म लेके काम करहू त बने परिणाम आगू आही। छत्तीगसढ़ के मनखे बड़ सहज अऊ सरल हे। ओ मन ल थोकन मार्गदर्शन देहे म ओ मन बहुत जल्दी सीख जाथें। छत्तीसगढ़ के हर एक गांव अपन आप म गणराज्य हे। ओ मन ल विश्वास म लेके काम करव, मनखे आप मन के संग देहीं।