फर्जी सरकारी आदेश सोसल मीडिया म होवत हे वायरल: रहव सावधान

रायपुर, खाद्य अऊ महिला बाल विकास विभाग के भर्ती ले जुड़े एक आदेश प्रदेश म वायरल होए हे। कई विभाग के अफसर म ल वॉट्सअप म ये आदेश मिले हे। अफसर एला असली समझत रहिन। फेर एला प्रशासन ह गलत बताइस। ये आदेश सामान्य प्रशासन विभाग के सचिव IAS डॉ कमलप्रीत सिंह के फर्जी दस्‍कत वाले हे जेला वायरल करे गए हे।
ये संबंध म जानकारी देवत सामान्य प्रशासन विभाग के सचिव डॉ. कमलप्रीत सिंह ह बताइस कि ये फर्जी आदेश ये। ये आदेश सामान्य प्रशासन विभाग कोति ले कभू जारी नइ करे गए हे। फर्जी आदेश म कहे गए हे कि राज्य शासन के कई ठन विभाग के पद मन म विशेष भर्ती अभियान के अंतर्गत प्रशिक्षण प्राप्त अभ्यर्थि मन के विभागीय परीक्षा म फेल लईका मन ल दूसरइया पईत अवसर दे जाही।
ये फर्जी आदेश म लिखे हे कि विभागवार परीक्षा म 205 अभ्यर्थी सामिल होइन जेमां 182 अभ्यर्थी पास होइन अऊ बांचे 23 फेल होइन। फेल अभ्यर्थि मन ल परीक्षा परिणाम घोषित होए के तारीक ले 15 दिन के भीतर दूसर अवसर प्रदान करत आखरी परीक्षा परिणाम 20 नवंबर तक घोषित करके परिणाम के एक प्रति कार्यालय ल जमा करावव। सरकार ह कहिस कि ये आदेश पूरा फर्जी हे अऊ ये मां मनगढ़ंत बात लिखे गए हे जेखर खंडन विभाग कोति ले करे जात हे।
डॉ. कमलप्रीत ह अपन ट्वीट म लिखिस के एक नक़ली चयन आदेश मोर हस्ताक्षर ले सामान्य प्रशासन विभाग कोति ले जारी देखात सोशल मीडिया म बगरत हे। ये आदेश पूरा असत्य हे अउ सामान्य प्रशासन विभाग ले ये प्रकार के कोनो आदेश जारी नइ होए हे।