गरब ले जीए के आजादी : मनरेगा के महिला हितग्राही मन के सम्मान समारोह

रायपुर, राज्य मनरेगा कार्यालय कोति ले मनरेगा (महात्मा गांधी राष्ट्रीय ग्रामीण रोजगार गारंटी अधिनियम) के अंतर्गत निजी जमीन म आजीविका संवर्धन के काम ले लाभान्वित 140 महिला मन ल सम्मानित करे गीस। अंतरराष्ट्रीय महिला दिवस ल आइकॉनिक वीक (ICONICI Week) के रूप म मनात मनरेगा म महिला हितग्राही मन के लगातार बाढ़त भागीदारी ल रेखांकित करके हर जिला ले पांच-पांच महिला मन के सम्मान करे गीस। पंचायत अउ ग्रामीण विकास मंत्री श्री टी.एस. सिंहदेव कार्यक्रम म मणिपुर ले ऑनलाइन सामिल होइन।
पंचायत अउ ग्रामीण विकास मंत्री श्री सिंहदेव ह सम्मान समारोह ल संबोधित करत कहिन कि मनरेगा के अंतर्गत निजी जमीन म आजीविका आधारित काम यथासम्भव महिला मन के नाम ले स्वीकृत करे जाना चाही। एखर से परिवार के आर्थिक प्रगति म उंखर सशक्त भागीदारी दर्ज होही। उमन गरब ले जीए के आजादी के थीम उपर आयोजित सम्मान समारोह म सात जिला धमतरी, गरियाबंद, राजनांदगांव, कांकेर, कोण्डागांव, कबीरधाम अऊ दंतेवाड़ा के महिला हितग्राही मन ले मनरेगा ले उंखर निजी जमीन म बने परिसम्पत्ति ले होवत लाभ अऊ आजीविका संवर्धन के जानकारी लीन। उमन ए महिला मन के काम मन के सराहना करत हौसला अफजाई घलोक करिन।
मनरेगा के महिला हितग्राही मन के सम्मान समारोह म मनरेगा ले बकरी पालन बर शेड प्राप्त करइया कबीरधाम जिला के सुश्री अहिल्या यादव, मछली पालन बर निजी जमीन म डबरी निर्माण ले लाभान्वित गरियाबंद जिला के श्रीमती फुलेश्वरी बाई साहू अऊ धमतरी के श्रीमती लता बाई अऊ मुर्गी पालन शेड के निर्माण के बाद मुर्गी पालन करइया कांकेर जिला के श्रीमती पदमनी कुमेटी ह आजीविका के अपन नवा साधन अऊ एखर से होवत कमाई के बारे म बताइन। पंचायत अउ ग्रामीण विकास मंत्री श्री सिंहदेव ह ए महिला मन ले ऊंखर कोति ले मुर्गी, बकरी अऊ पशु शेड म करे जात काम मन के जानकारी लेहे के बाद उंखर से चारा व्यवस्था, इलाज, दवई अऊ बाजार म मिलत कीमत के बारे म घलोक पूछिन। उमन आगू अऊ घलोक बेहतर काम बर अपन शुभकामना दीन।
सम्मान समारोह म पंचायत अउर ग्रामीण विकास विकास के उप सचिव अउ अपर आयुक्त, मनरेगा श्री अशोक चौबे, सबो जिला पंचायत के अध्यक्ष अउ मुख्य कार्यपालन अधिकारी, आज सम्मानित महिला हितग्राही मन के ग्राम पंचायत के सरपंच अऊ मनरेगा के राज्य व मैदानी टीम के अधिकारी-कर्मचारी वर्चुअल रूप ले मौजूद रहिन।