दुर्ग, 2 दिसंबर 2020। भिलाई के शान म आज एक अऊ सितारा लग गे हे। पं. जवाहर लाल नेहरू ह जइसे भिलाई शहर के सपना संजोए रहिस तइसनहे दुनिया भर म भिलाई के शान, मान अऊ अभिमान हे। पं. नेहरू ह देस म आईआईटी सुरू करे रहिन उंखर ये कड़ी अब भिलाई तक पहुंच गए हे। अब भिलाई ह देश के तेईसवां आईआईटी बन गए हे, ये हमर बर गरब के बात हे। ये बात मुख्यमंत्री श्री भूपेश बघेल ह आईआईटी भिलाई के शैक्षणिक क्षेत्र कारिडोर के भूमिपूजन अऊ कई ठन भवन मन के अधिरचना स्थापन कार्यक्रम के अवसर म कहिन। मुख्यमंत्री ह कार्यक्रम म सबले पहिली सुपर स्ट्रक्चर उपर ईंटा धरिन। ये ब्रिक लेयिंग सेरेमनी के हिस्सा होथे। एखर बाद कार्यक्रम स्थल ले मुख्यमंत्री ह शिला पट्ट के अनावरण करिन। एखर बाद उमन थ्री डी माडल के अनावरण घलोक करिन।
ये बेरा म आईआईटी के फस्ट फेज के डिजाइन के संबंध म विस्तार ले जानकारी देहे गीस। मुख्यमंत्री ह ये बेरा म कहिन के आईआईटी के माध्यम ले छत्तीसगढ़ म रिसर्च ल बढ़ावा मिलही, जऊन इहां लौह आधारित उद्योग मन बर अड़बड़ उपयोगी होही। उमन कहिन के हमन छत्तीसगढ़ म धान आधारित एथेनाल उद्योग म काम करइया हन। आईआईटी म कहूं एखर कास्ट कटिंग म कोनो रिसर्च होही त ये उद्योग बर अड़बड़ उपयोगी होही। उमन कहिन के छत्तीसगढ़ जइसे कृषि आधारित अर्थव्यवस्था वाले राज्य मन बर आईआईटी ल अइसन रिसर्च माडल विकसित करना चाही। उमन आशा व्यक्त करिन के आईआईटी परिसर के निर्माण 2022 तक पूरा हो जाही अऊ ये संस्थान हर मायने म उपयोगी होही। मुख्यमंत्री ह कहिन के टेक्नालाजी ह जीवन ल बदलथे, पहिली एलुमीनियम अड़बड़ महंगी चीज होत रहिस अब ये सुलभ हे। इलेक्ट्रानिक घड़ी मन अड़बड़ महंगी होत रहिस अब ये अड़बड़ सस्ता हे। आईआईटी के माध्यम ले छत्तीसगढ़ म घलोक विकास के नवा संभावना पैदा होही।
ये बेरा म गृह मंत्री श्री ताम्रध्वज साहू ह कहिन के नेहरू जी ह भिलाई स्टील प्लांट के सौगात हमार प्रदेश ल देहे रहिन। एखर सेती तेजी ले विकास के रद्दा खुले हे। आईआईटी भिलाई के माध्यम ले घलोक छत्तीसगढ़ म विकास के नवा संभावना खुलही। ये मौका म कृषि अऊ जलसंसाधन मंत्री श्री रविंद्र चौबे ह कहिन के मुख्यमंत्री श्री भूपेश बघेल के नीति के सेती कोरोना काल म घलोक छत्तीसगढ़ के अर्थव्यवस्था मजबूत बने रहे हे। उमन कहिन के किसान मन ल खुशहाल करे के माध्यम ले हर वर्ग ल खुशहाल करे जात हे ये नीति सफल रहीस, एकर श्रेय मुख्यमंत्री ल जाथे। ये मौके म उच्च शिक्षा मंत्री श्री उमेश पटेल ह कहिन के आईआईटी जइसे संस्था मन कास्ट कटिंग म रिसर्च करव। छत्तीसगढ़ म जिहां लौह उद्योग के संख्या अड़बड़ हे। आईआईटी के ये रिसर्च वरदान साबित हो सकत हे। पीएचई मंत्री श्री गुरु रुद्र कुमार ह कहिन के भिलाई आईआईटी के माध्यम ले टेक्नालाजी के क्षेत्र म छत्तीसगढ़ बर नवा संभावना बनत रइही। ये संस्थान हमार प्रतिभाशाली छात्र मन ल सबले बढ़िया प्लेटफार्म उपलब्ध कराही। आईआईटी के डायरेक्टर श्री रजत मूना ह संस्थान के विशेषता मन के बारे म विस्तार ले जानकारी दीन। उमन बताइन के पहिली चरण म 18 लेक्चर हाल अऊ क्लास रूम बनाए जाही। इंजीनियरिंग अऊ साइंस डिपार्टमेंट के संगेच लाइब्रेरी अऊ आईटीआईएल बिल्डिंग अऊ आब्जर्वेटरी टावर घलोक बनाये जाही। एखर संगेच तीन हास्टल अऊ तीन रेसीडेंशियल टावर घलोक बनही। ये मौका म राज्यसभा सांसद सुश्री सरोज पांडे, भिलाई विधायक अऊ महापौर श्री देवेंद्र यादव, कलेक्टर डॉ. सर्वेश्वर नरेन्द्र भूरे, एसपी श्री प्रशांत ठाकुर अऊ आन गणमान्य अतिथि उपस्थित रहिन।
भिलाई के शान ये आईआईटी: मुख्यमंत्री भूपेश बघेल
