सेतगंगा म अवैध रूप ले संचालित क्लिनिक सील
मुंगेली 09 अप्रैल 2020। जिला म अवैध रूप से संचालित चिकित्सा प्रतिष्ठान (क्लिनिक) के अब खैर नई हे। कलेक्टर अउ जिला दंडाधिकारी डॉ. सर्वेश्वर नरेंद्र भुरे के हुकुम म अनुविभागीय दंडाधिकारि, स्वास्थ्य विभाग के अधिकारी अउ कार्य पालिक दंडाधिकारी मन, संघरा जिला म संचालित चिकित्सा प्रतिष्ठान (क्लिनिक) के सरलग अउ उदुपहा जांच करत हें। जांच म कहूं कोनो चिकित्सा प्रतिष्ठान (क्लिनिक) ल अवैध पाय जात हे त वोकर विरूद्ध सख्त कार्यवाही करे जात हे। इही कड़ी म आज जिला नोड़ल अधिकारी डॉ. सुरेश रात्रे, नायब तहसीलदार अउ कार्य पालिक दंडाधिकारी श्री उमाकांत जायसवाल अउ नर्सिंग होम एक्ट के तहत नियुक्त प्रभारी लिपिक श्री योगेंद्र भास्कर मन जिला के सेतगंगा के डॉ. रामजी शर्मा अउ श्री दूजराम देवांगन के घर म संचालित क्लिनिक म दबिश दीन। दबिश के दौरान क्लिनिक म अवैध रूप से एलोपैथिक दवई पाए गीस, जेला जप्ती कर के घर म संचालित क्लिनिक ल सील कर दे गीस अउ संबंधित ल इलाज पानी के काम बंद करे के निर्देश देहे गीस।
मुंगेली ले गुरतुर गोठ बर दिलीप बसंत
