बिलासपुर, 11 जून 2020। बिलासपुर म कोरोना चेकिंग के नाम म दुकानदार मन ले अवैध वसूली होय बर लगे हे. अइसे ही मामला सीपत थाना क्षेत्र म आगु आये हे, जिहां फर्जी महिला अउ पुरुष पुलिस अधिकारी ल अवैध वसूली के शिकायत म गिरफ्तार करके न्यायालय म पेश करे गे हे.
जानकारी के अनुसार, पुलिस ल सूचना मिलिस की एक पुरुष अउ एक महिला अपन आप ल बड़का पुलिस अधिकारी बतावत सीपत थाना क्षेत्र अंतर्गत ग्राम करमा अउ मंजूरपहरी म दुकानदार मन ले अवैध वसूली करत हे. सूचना म सीपत थाना के पुलिस पेट्रोलिंग पार्टी ह घेराबंदी करके स्कार्पियो सवार महिला अउ पुरुष ल पकड़िस. महिला के पहिचान 23 वर्षीय सरकंडा, बिलासपुर निवासी नुपूर शर्मा पति नरेंद्र शर्मा अउ पुरुष के पहिचान 23 वर्षीय सरकंडा, बिलासपुर निवासी आशीष उर्फ वासु पाण्डेय के रूप म करे गे हे.
दुनो आरोपी मन के पास ले नगद 8100 रुपिया बरामद करे गिस, जोन ल उमन करमा अउ मंजूर पहरी के किराना, हार्डवेयर, मेडिकल, कपड़ा व्यापारी मन ले वसूल करे रहिस. मामला म धारा 419, 420, 34 भादवि पंजीबद्ध करके आरोपी मन ल गिरफ्तार कर न्यायालय म पेश करे गिस.