महतारी वंदन योजना के पइसा ले होवत हे सबे जरूरी काम
कोरबा, 26 अगस्त 2024। जिला के पाली विकासखण्ड अंतर्गत ग्राम हरनमुड़ी के 70 बछर के सियनहिन वृद्धा ध्वजा बाई ल कुछ महिना पहिली तक अपन छोटे-छोटे जरूरत बर मनखे मन ले पइसा मांगे ल परय। कई पइत कुछ रूपिया बर ओ ल कई दिन तक अगोरा तको करना परय। अब महतारी वंदन योजना ले हर महीना अवेखर खाता म एक हजार रूपिया बेरा म मिलत हे त सियनहिन ल काखरो आगू रूपिया बर हाथ पसारे के जरूरत नइ परत हे। ग्राम हरनमुड़ी के ध्वजा बाई ह बताइस के उमर के संगेच ओ ल काम करे म अब परेशानी होथे, वो ह जइसे-तइसे छोटे-मोटे घरेलू काम कर लेथे। वेा ह बताइस के पाछू महिना महतारी वंदन योजना ले मिले पइसा ल बैक ले निकाल लेहे हे। वोकर उपयोग वो ह अपन इलाज अऊ बीमारी के समय दवइ, फल आदि म करे हे।
वोकर बताती महतारी वंदन योजना ल छत्तीसगढ़ सरकार ह लागू कर के हमर जइसे सियान महिला मन बर वरदान देहे हे। हर महीना खाता म 01 हजार मिल जाथे, एखर से छोटे-मोटे जरूरत हम पूरा कर लेथन। वो ह महतारी वंदन योजना लागू करे ले गांव के गरीब अऊ जरूरतमंद महिला मन ल बहुत सही लाभ पहुंचे के बात कहीस अऊ ए योजना बर मुख्यमंत्री श्री विष्णुदेव साय सरकार खातिर आभार घलोक प्रकट करिन।