रायपुर, चहकत लइका अऊ ऊंखर नटखट अंदाज हर कोनो ल स्वभाविक रूप ले आकर्षित कर लेथे। खिलखिलात लइका मन के अइसनेच सुग्घर नजारा नारायणपुर जिला के पोषण पुनर्वास केन्द्र मन म देखे ल मिलत हे। कुपोषण के खिलाफ लड़ाई म पोषण पुनर्वास केन्द्र ह बड़का भूमिका निभावत हे। ए केन्द्र मन म शारीरिक रूप ले कमजोर अऊ कुपोषित लइका मन ल सामान्य श्रेणी म लाय बर विशेष प्रयास करे जात हे। गांधी जयंती 2 अकटूबर के अवसर म शुरू होए मुख्यमंत्री सुपोषण अभियान के तहत् नवम्बर महिना तक जिला के गंभीर कुपोषित 150 लइका मन ल पुर्नवास केन्द्र म भर्ती करके सामान्य श्रेणी म लाए जा चुके हे। पोषण पुनर्वास केन्द्र मन के अकतहा जिला म संचालित 557 आंगनबाड़ी केन्द्र मन म सुपोषण अभियान के तहत महिला अऊ लइका मन ल पौष्टिक भोजन देहे जात हे । सुपोषण रथ, कला जत्था के माध्यम ले घलोक मनखे मन म पौष्टिक आहार लेहे बर जनजागरूकता अभियान चलाए जात हे। एकर असर मनखे मन म दिखे लगे हे।
नारायणपुर जिला चिकित्सालय म अपन लइका ल पुनर्वास केंद्र म लाए ग्राम बेलगांव निवासी श्रीमती कमलबती ह बताइस कि मितानिन के सलाह म वो अपन 2 साल के लइका सुभाष के संग पाछू 10 दिन ले केन्द्र म रहत हे। सरलग स्वास्थ्य परीक्षण अउ पौष्टिक आहार ले लइका के स्वास्थ्य म सुधार आए हे। अब वो दिन भर खेलथे अऊ खाए के प्रति रूचि घलोक बाढ़े हे। सुभाष के नटखट हरकत मन ले अस्पताल के दूसर मरीज अउ परिजन घलोक आकर्षित हो जात हें। अइसनहे ग्राम सरगीपाल के डेढ़ साल के कुमारी दुर्गेश घलोक पाछू 14 दिन ले पुर्नवास केन्द्र म भर्ती हे। कुमारी दुर्गेश के मां सनबती बाई ह बताइस कि पहिली वो शारीरिक रूप ले कमजोर रहिस अऊ गुमसुम रहत रहिस। अच्छा खानपान अऊ देखभाल ले दुर्गेश के सेहत म सुधार आए हे अब दुर्गेश बिक्कट खेलथे। केन्द्र म स्वास्थ्य लाभ लेवत सबो लइका मन के स्वास्थ्य म धीरे-धीरे सुधार होवत हे। इहां लइका मन के माता मन ल घर म पौष्टिक आहार तियार करे बर घलोक बताए जात हे। एखर अलावा पोषण पुर्नवास केन्द्र म स्वास्थ्य संबंधी साफ-सफाई आदि के जानकारी घलोक दिए जात हे।
जिला म 5 पोषण पुनर्वास केंद्र संचालित हे। जेमां नारायणपुर विकासखण्ड म जिला चिकित्सालय अऊ ओरछा विकासखण्ड म सामुदायिक स्वास्थ्य केन्द्र ओरछा अऊ रामकृष्ण मिशन आश्रम कोति ले कुंदला, ओरछा अऊ आकाबेड़ा म 10-10 बेड वाले पोषण पुनर्वास केंद्र संचालित हे। मितानिन अउ आंगनबाड़ी कार्यकर्ता अऊ सहायिक मन के माध्यम ले गंभीर कुपोषित लइका मन ल पोषण पुनर्वास केन्द्र म भर्ती करे जात हे। इहां लइका के माता अउ लइका ल शिशु रोग विशेषज्ञ के निगरानी म जरूरी उपचार अउ पौष्टिक आहार प्रदान करे जात हे। ओ मन ल स्वास्थवर्धक दवाई के संगेच दूध, खिचड़ी आदि पौष्टिक आहार देहे जात हे।
