रायपुर 05 जुलाई 2021। मुख्यमंत्री श्री भूपेश बघेल ह कहे हें के भगवान श्रीराम के ननिहाल छत्तीसगढ़ म ऊंखर वन गमन के स्मृति मन ल जीवंत बनाए बर राज्य के उत्तरी छोर कोरिया ले लेके दक्षिण म सुकमा तक राम वनगमन पर्यटन परिपथ के लउहे विकास करे जात हे, परिपथ के चिन्हित स्थल मन म पौराणिक प्राचीन स्वरूप ल संरक्षित करत विकसित करे जात हे। अवइया समय म छत्तीसगढ़ के राम वन गमन पर्यटन परिपथ देश-विदेश के पर्यटक मन के आकर्षण के प्रमुख केन्द्र के रूप म उभरही। उमन कहिन के छत्तीसगढ़ म ऐतिहासिक, पुरातात्विक, धार्मिक, सांस्कृतिक महत्व के बहुत अकन स्थल मन के संग आन सुंदर प्राकृतिक स्थल अऊ जलप्रपात घलोक हे। पर्यटन ल बढ़ावा देहे बर ए स्थल मन म पर्यटक मन के रूके के सुविधा संग सबो जरूरी सुविधा विकसित करे जाही, त छत्तीसगढ़ ल पर्यटन के क्षेत्र म नवा पहिचान मिलही।
मुख्यमंत्री श्री भूपेश बघेल आज इहां अपन निवास कार्यालय म राज्य सरकार के महत्वाकांक्षी परियोजना राम वन गमन पर्यटन परिपथ के प्रगति संग कई ठन योजना मन के समीक्षा करत रहिन। उमन कहिन के छत्तीसगढ़ म पर्यटन के विकास के व्यापक संभावना हे। पर्यटन ल बढ़ावा देहे बर महत्वपूर्ण पर्यटन स्थल मन ल जोड़त सर्किट बनाए जाही। उमन कहिन के राजिम म महानदी म जल कुंड बनाए जाए, ताकि उहां श्रद्धालु मन बर नहाए के व्यवस्था होवय अऊ अइसन व्यवस्था करे जाय के नदी म पानी सरलग बने रहय। मुख्यमंत्री ह राम वन गमन पर्यटन परिपथ विकास के तहत पहिली चरण म चुने गए 9 स्थल मन के प्रगति के संगेच सिरपुर ल हेरिटेज स्थल के रूप म बुद्धिष्ट थीम म करे जात विकास, मां बम्लेश्वरी देवी मंदिर डोंगरगढ, प्रज्ञागिरी स्थल के विकास, ट्रायबल टूरिज्म सर्किट के तहत होवत काम के समीक्षा करिन। बैठक म पर्यटन मंत्री श्री ताम्रध्वज साहू, मुख्य सचिव श्री अमिताभ जैन, मुख्यमंत्री के अपर मुख्य सचिव श्री सुब्रत साहू, प्रमुख सचिव वन श्री मनोज कुमार पिंगुआ, मुख्यमंत्री के सचिव श्री सिद्धार्थ कोमल सिंह परदेशी, पर्यटन सचिव श्री अन्बलगन पी. अउ छत्तीसगढ़ पर्यटन मंडल के प्रबंध संचालक श्री यशवंत कुमार उपस्थित रहिन।
बैठक म सचिव पर्यटन ह प्रस्तुतिकरण के संग राम वन गमन पर्यटन परिपथ के प्रगति के जानकारी दीन। उमन बताइन के ये योजना के तहत पहिली चरण म 9 स्थल- सीतामढ़ी-हरचौका (कोरिया), रामगढ़ (सरगुजा), शिवरीनारायण-खरौद (जांजगीर-चांपा), तुरतुरिया (बलौदाबाजार), चंदखुरी (रायपुर), सिहावा-सप्तऋषि आश्रम (धमतरी), रामाराम (सुकमा) के विकास करे जात हे। चंदखुरी म कौशिल्या माता मंदिर परिसर म तीन चरण म काम करे जात हे, जेमां ले पहिली अउ दूसर चरण के 90 प्रतिशत विकास कार्य पूरा हो गए हे। उमन बताइन के शिवरीनारायण म विकास कार्य प्रगति म हे। इहां पहिली चरण के विकास कार्य दिसम्बर 2021 तक पूरा करे के लक्ष्य हे। राम वन गमन पर्यटन परिपथ के चिन्हित 9 स्थल म ले 4 स्थल रामगढ़, तुरतुरिया, सिहावा-सत्पऋषि आश्रम अउ तीरथगढ़ वन क्षेत्र म होए के सेती इहां के काम वन विभाग के माध्यम ले कराया जात हे। ये परिपथ म राजस्व, नगरीय प्रशासन अउ विकास, संस्कृति, पर्यटन, जल संसाधन अऊ वन विभाग के समन्वय ले विकास कार्य करे जात हे।
बैठक म बताए गीस के सिरपुर ल हेरिटेज स्थल के रूप म बुद्धिष्ट थीम म विकसित करे बर 62 करोड़ 96 लाख रूपिया लागत के कांसेप्ट प्लान तियार करे गए हे। एकर विकास तीन चरण म प्रस्तावित हे। इहां मुख्य रूप ले तीन भव्य स्वागत द्वार, पार्किंग साईनेजेस, एडमिन बिल्डिंग, लैण्डस्केपिंग, 15 गजिबो-पगोड़ा, बुद्धिष्ट थीम पार्क, रायकेरा तालाब के चारों कोति पथरा ले पिंचिंग अउ फुटपाथ, सायकल ट्रेक, ओपन एयर थियेटर बनवाए जाही। ट्रायबल टूरिज्म सर्किट के तहत 96 करोड़ 10 लाख रूपिया के लागत ले 13 स्थल मन ल विकसित करे जात हे, एमां ले जशपुर म एथनिक पर्यटन ग्राम, कुनकुरी म मार्ग सुविधा केंद्र, कुरदर बिलासपुर म एथनिक टूरिस्ट डेस्टीनेशन डेवलपमेंट, सरोधा दादर म एथनिक पर्यटन ग्राम, गंगरेल म ईको एथनिक टूरिस्ट डेस्टीनेशन डेवलपमेंट, नथियानवागांव म मार्ग सुविधा केंद्र, कोण्डागांव म एथनिक टूरिस्ट डेस्टीनेशन डेवलपमेंट, जगदलपुर म एथनिक टूरिस्ट डेस्टीनेशन डेवलपमेंट अऊ चित्रकोट म ईको एथनिक टूरिस्ट डेस्टीनेशन डेवलपमेंट के काम पूरा कर ले गए हे, जबकि तीरथगढ़, मैनपाट अउर कमलेश्वरपुर म ईको एथनिक टूरिस्ट डेस्टीनेशन डेवलपमेंट अऊ महेशपुर म मार्ग सुविधा केंद्र के काम अवइया सितमबर महिना तक पूरा करे के लक्ष्य हे।
एडवेंचर स्पोर्टस के तहत कोरबा के सतरेंगा म 9 करोड़ 43 लाख रूपिया के लागत ले जल पर्यटन के सुविधा विकसित करे जात हे। पर्यटन सचिव ह बताइस के निजी निवेश योजना के तहत मानातुता म थीम एम्यूजमेंट पार्क, तेलीबांधा स्थित होटल जोहार छत्तीसगढ़ म टूरिज्म कमर्शियल काम्पलेक्स अऊ मैनपाट के सैला रिसॉर्ट म नेचर केयर-वेलनेस सेंटर विकसित करे के योजना हे। उमन बताइन के राज्य होटल प्रबंध संस्थान नवा रायपुर म ये समय 10 छात्र बीएससी हॉस्पिटेलिटी एंड होटल एडमिनिस्ट्रेशन अऊ 38 छात्र डिप्लोमा ए फूड प्रोडक्शन म ऑनलाईन पढ़ाई करत हे। बैठक म जानकारी देहे गीस के राम वन गमन पर्यटन परिपथ के कई स्थल मन म एक लाख 68 हजार ले जादा पौधा के रोपण करे गए हे। करीबन 36 करोड़ रूपिया के लागत ले 18 बायोडायवर्सिटी पार्क विकसित करे जात हे। एमां ले कुछ पार्क राम वन गमन पर्यटन परिपथ के 10 किलोमीटर के परिधि म विकसित करे जात हे, जेन पर्यटक मन बर आकर्षण के केन्द्र होही।
Important-tourist-places-in-chhattisgarh
Sirpur Heritage Site Buddhist Theme, Ethnic Tourism Village Kunkuri in Tribal Tourism Circuit, Kurdar Bilaspur Ethnic Tourist Destination Development, Saroda Dadar Ethnic Tourism, Village Gangrel Eco Ethnic Tourist Destination Development, Nathia Navagaon Kondagaon Ethnic Tourist Destination Development, Jagdalpur Ethnic Tourist Destination Development and Tourist De Eco Ethnic in Chitrakoot Development, Eco Ethnic Tourist Destination Development in Tirathgarh, Mainpat and Kamleshwarpur, Maheshpur, Adventure Sports Korba Satrenga Water Tourism Facility, Manatuta Theme Amusement Park, Telibandha Hotel Johar Chhattisgarh Tourism Commercial Complex, Saila Resort Nature Care-Wellness Center at Mainpat, Ram Van Gaman Tourist Circuit