मुख्यमंत्री ह पुलिस विभाग के 255 करोड़ रुपिया के लागत के विकास काम मन के करिन वर्चुअली लोकार्पण
पुलिस विभाग ल 08 नवा साइबर थाना समेत पुलिस आवासीय भवन अऊ नवा थाना भवन मन के मिलिस सौगात
रायपुर, मुख्यमंत्री श्री विष्णु देव साय ह आज पुलिस मुख्यालय नया रायपुर ले वर्चुअली जुड़ के अलग-अलग जिला मन म 8 नवा साइबर थाना अऊ 255 करोड़ रुपिया के लागत ले तियार पुलिस आवासीय भवन अऊ थाना भवन मन के लोकार्पण करिन। मुख्यमंत्री ह प्रदेशवासी अऊ पुलिस के जवान मन ल ए विशेष पहल बर शुभकामना दीन्।
मुख्यमंत्री श्री साय ह ए मौका म कहिन के आज के दिन पुलिस विभाग बर बहुत बड़ भाग्य के दिन हे, काबर कि 255 करोड़ रुपिया के अलग-अलग निर्माण काम मन के लोकार्पण करे गे हे। उमन कहिन के प्रेजेंटेशन के माध्यम ले हमन देखेन के साइबर थाना, एसडीओपी कार्यालय, चौकी भवन, ट्रांजिट हॉस्टल अऊ आवासीय भवन बहुत सुंदर अऊ सुविधाजनक बनाए गे हे। मुख्यमंत्री ह गुणवत्तापूर्ण निर्माण बर संबंधित एजेंसी मन के सराहना करत हुए कहिन के ए सुविधा मन ले पुलिस अधिकारी अऊ कर्मचारी मन ल सकारात्मक वातावरण म काम करे के प्रेरणा मिलही अऊ ओ मन अपन कर्तव्य मन ल अऊ बने ढंग ले निभा सकही। श्री साय ह कहिन के सरकार के सरलग उदीम हे के कर्मचारी अऊ अधिकारी मन ल बेहतर आवास अऊ काम करे के सुविधा मिलय, जेखर ले प्रदेश म कानून व्यवस्था अऊ मजबूत हो सकय। उमन कहिन के ए ह एक बने सुरुआत हे अऊ एकर ले दूर-दराज के अंचल मन तक घलो सुरक्षा व्यवस्था ल मजबूत करे जा सकही।
उप मुख्यमंत्री अऊ गृह मंत्री श्री विजय शर्मा ह बताइन के प्रदेश म साइबर अपराध मन ऊपर प्रभावी नियंत्रण बर कतको जघा म साइबर पुलिस थाना मन के सुरुआत करे जावत हे। आज जशपुर, रायगढ़ अऊ राजनांदगांव जिला समेत कुल 8 नवा साइबर थाना मन के शुभारंभ करे गे हे। एकर ले पहिली प्रदेश के पांच जिला मन म साइबर थाना चलत हे। भविष्य म जरूरत के हिसाब ले आने जिला मन म घलो साइबर थाना खोले जाही। एकर संगेच चार जिला मन म भारत वाहिनी के कैंपस, नौ जिला मन म नवा थाना भवन, माना म सेंट्रल आर्म्ड फोर्स के चौकी अऊ आवासीय भवन मन के घलो लोकार्पण करे गीस। गृहमंत्री श्री शर्मा ह 255 करोड़ रुपिया के लागत ले पूरा होय ए निर्माण काम मन अऊ 8 नवा साइबर थाना के स्वीकृति अऊ लोकार्पण बर मुख्यमंत्री श्री विष्णु देव साय के प्रति आभार व्यक्त करत हुए सब्बो ल बधाई अऊ शुभकामना दीन्।
ए बेरा म मुख्य सचिव श्री विकास शील, अपर मुख्य सचिव श्री मनोज कुमार पिंगुआ, मुख्यमंत्री के प्रमुख सचिव श्री सुबोध कुमार सिंह, पुलिस महानिदेशक श्री अरुण देव गौतम, मुख्यमंत्री के सचिव श्री राहुल भगत, गृह विभाग के सचिव श्री हिमशिखर गुप्ता, पुलिस महानिदेशक पुलिस हाउसिंग कॉर्पोरेशन श्री पवन देव, एडीजी श्री एसआरपी कल्लूरी, एडीजी श्री प्रदीप गुप्ता, एडीजी विवेकानंद सिन्हा, एडीजी श्री दीपांशु काबरा, एडीजी श्री अमित कुमार समेत अन्य वरिष्ठ अधिकारी उपस्थित रहिन। संगेच वनमंत्री श्री केदार कश्यप, उद्योग मंत्री श्री लखन लाल देवांगन, विधायक श्री योगेश्वर राजू सिन्हा, विधायक श्री भईया लाल रजवाड़े, श्री ललित चंद्राकर, विधायक श्रीमती रायमुनि भगत अऊ जनप्रतिनिधि मन वर्चुअल माध्यम ले कार्यक्रम म सहभागी रहिन।
जानबा हे के आज मुख्यमंत्री ह बालोद जिला के 21वीं भारत रक्षित वाहिनी करकाभाट, पुलिस थाना भवन सनौद, महासमुंद जिला के 20वीं भारत रक्षित वाहिनी परसदा, धमतरी जिला के पुलिस चौकी भवन करेलीबड़ी, रायपुर जिला के सेन्ट्रल आर्म्स स्टोर, 4थीं वाहिनी माना, ट्रांजिट हॉस्टल, बस्तर जिला के 19वीं भारत रक्षित वाहिनी करनपुर, बीजापुर जिला के पुलिस थाना भवन तर्रेम, पुलिस थाना भवन नैमेड़, सुकमा जिला के पुलिस थाना भवन चिंतागुफा, पुलिस थाना भवन चिंतलनार, कांकेर जिला के 22वीं भारत रक्षित वाहिनी भीरावाही, नारायणपुर जिला के पुलिस थाना भवन भरण्डा, पुलिस थाना भवन बैनुर, ट्रांजिस्ट हॉस्टल नारायणपुर, दुर्ग जिला के पुलिस थाना भवन पद्द्मनाभपुर, पुलिस थाना भवन पुलगांव, 36 अराजपत्रित अऊ 48 प्रधान आरक्षक आवासगृह, एस.डी.ओ.पी. कार्यालय भवन धमधा, बेमेतरा जिला के एस.डी.ओ.पी. कार्यालय भवन बेरला, राजनांदगांव जिला के एस.आई.बी. फिल्ड यूनिट, ट्रांजिट हॉस्टल, दुर्ग, सूरजपुर जिला के पुलिस चौकी कुदरगढ़, कोरिया जिला के 24 अराजपत्रित अऊ 144 प्र.आर./आरक्षक आवासगृह बैकुण्ठपुर अऊ ट्रांजिट हॉस्टल बलरामपुर के लोकार्पण करिन।