- पूर्व प्रधानमंत्री स्व. श्री राजीव गांधी के पुण्य तिथि म मुख्यमंत्री श्री भूपेश बघेल करहीं शुभारंभ
- 5700 करोड़ रूपिया के राशि डीबीटी के माध्यम ले चार किश्त म जाही किसान मन के खाता म
- प्रदेश म धान, मक्का अऊ गन्ना (रबी) के 19 लाख किसान मन ल मिलही फायदा
- अवइया सीजन म दलहन अऊ तिलहन म घलोक मिलही सहायता राशि
- गन्ना किसान मन ल साल 2018-19 के बकाया बोनस 10.27 करोड़ रूपिया घलोक मिलही
रायपुर, 19 मई 2020। छत्तीसगढ़ सरकार प्रदेश म फसल उत्पादन ल प्रोत्साहित करे अऊ किसान मन ल उंखर उपज के सही दाम मिलय ए खातिर दूरगामी निर्णय लेत राजीव गांधी किसान न्याय योजना शुरू करइया हे। मुख्यमंत्री श्री भूपेश बघेल देश के पहिली प्रधानमंत्री स्व.श्री राजीव गांधी के पुण्यतिथि 21 मई के दिन वीडियो कांफ्रेसिंग के संग प्रदेश म ये योजना के विधिवत् शुभारंभ करहीं। ये योजना के तहत प्रदेश के 19 लाख किसान मन ल 5700 करोड़ रूपिया के राशि चार किश्त म सीधा ऊंखर खाता म हस्तांतरित करे जाही। राजीव गांधी किसान न्याय योजना किसान मन ल खेती-किसानी बर प्रोत्साहित करे के देश म अपन जइसे एक बड़का योजना ये। योजना के शुभारंभ कार्यक्रम म मुख्यमंत्री संग प्रदेश के मंत्रीगण, जनप्रतिनिधि अऊ किसान वीडियो कांफ्रेसिंग के संग सामिल होहीं।
राज्य सरकार ये योजना के संग किसान मन ल खेती किसानी बर प्रोत्साहित करे बर खरीफ 2019 ले धान अऊ मक्का लगइया किसान मन ल सहकारी समिति के माध्यम ले उपार्जित मात्रा के आधार म सबले जादा 10 हजार रूपिया प्रति एकड़ के दर ले अनुपातिक रूप ले आदान सहायता राशि देहे जाही। ये योजना म धान फसल बर 18 लाख 34 हजार 834 किसान मन ल पहिली किश्त के रूप म 1500 करोड़ रूपिया के राशि प्रदान करे जाही।
अइसनहे गन्ना फसल बर पेराई साल 2019-20 म सहकारी कारखाना ले क्रय करे गन्ना के मात्रा के आधार म एफआरपी राशि 261 रूपिया प्रति क्विंटल अऊ प्रोत्साहन अउ आदान सहायता राशि 93.75 रूपिया प्रति क्विंटल अर्थात सबले अधिक 355 रूपिया प्रति क्विंटल के दर ले भुगतान करे जाही। एखर तहत प्रदेश के 34 हजार 637 किसान मन ल 73 करोड़ 55 लाख रूपिया चार किश्त म मिलही। जेमां ले पहिली किश्त 18 करोड़ 43 लाख 21 मई के हस्तांतरित करे जाही।
छत्तीसगढ़ सरकार ह एखरे संगेच साल 2018-19 म सहकारी शक्कर कारखाना मन के माध्यम ले खरीदे गए गन्ना के मात्रा के आधार म 50 रूपिया प्रति क्विंटल के दर ले प्रोत्साहन राशि (बकाया बोनस) घलोक देहे जात हे। एखर तहत प्रदेश के 24 हजार 414 किसान मन ल 10 करोड़ 27 लाख रूपिया देहे जाही।
राज्य सरकार ह ये योजना के तहत खरीफ 2019 म सहकारी समिति/लैम्पस के माध्यम ले उपार्जित मक्का फसल के किसान मन ल घलोक लाभ देहे के निर्णय लेहे हे। मक्का फसल के आकड़ा लेहे जात हे। जेखर आधार म अवइया किश्त म उमन ल भुगतान करे जाही।
छत्तीसगढ़ सरकार ह प्रदेश के अर्थव्यवस्था ल गतिशील अऊ मजबूत बनाए बर लॉकडाउन जइसे संकट के समय म किसान मन ल फसल बीमा अऊ प्रधानमंत्री किसान सम्मान योजना के तहत 900 करोड़ के राशि ऊंखर खाता मन म अंतरित करे हे। मुख्यमंत्री श्री भूपेश बघेल के सियानी म राज्य सरकार ह एखर पहिली करीबन 18 लाख किसान मन के 8800 करोड़ रूपिया के करजा माफ करे रहिस हे संगेच कृषि जमीन अर्जन म चार गुना मुआवजा, सिंचाई कर माफी जइसे कदम उठाके किसान मन ल राहत पहुंचाए रहिस हे।
ये योजना म राज्य सरकार ह खरीफ 2020 ले ये मां धान, मक्का, सोयाबीन, मूंगफली, तिल, अरहर, मूंग, उड़द, कुल्थी, रामतिल, कोदो, कोटकी अऊ रबी म गन्ना फसल ल सामिल करे हे। सरकार ह ये घलोक कहे हे के अनुदान लेवइया किसान कहूं पउर साल धान के फसल लेथे अऊ ये साल धान के जगा म योजना म सामिल आन फसल लेथे त अइसन स्थिति म ओ मन ल प्रति एकड़ अकतहा सहायता देहे जाही।
भारत रत्न पूर्व प्रधानमंत्री स्व. श्री राजीव गांधी जी के शहादत दिवस 21 मई पर होगा “राजीव गांधी किसान न्याय योजना” का शुभारम्भ।
हमें संतोष है कि हम किसानों से किए गये वादे को साकार रूप देने में कामयाब हो रहे हैं। pic.twitter.com/r2z8oq3OUh
— Bhupesh Baghel (@bhupeshbaghel) May 19, 2020
