मुख्यमंत्री ह करिस शाला प्रवेश उत्सव के शुभारंभ

रायपुर, मुख्यमंत्री श्री भूपेश बघेल ह आज अपन निवास कार्यालय ले आयोजित वर्चुअल कार्यक्रम म प्रदेश के स्कूल मन म शाला प्रवेश उत्सव के शुभारंभ करिन। मुख्यमंत्री ह कार्यक्रम म बटन दबाके नक्सल प्रभावित चार जिला- सुकमा, दंतेवाड़ा, बीजापुर अऊ नारायणपुर म डेढ़ दशक ले बंद पड़े 260 स्कूल मन ल फेर शुरू करिन। ए स्कूल मन म 11 हजार 13 लइका मन ह प्रवेश लेहे हें। बीजापुर जिला म सबसे जादा 158, सुकमा जिला म 97, नारायणपुर जिला म 4 अऊ दंतेवाड़ा जिला म एक बंद स्कूल फेर खोले जात हे। शाला प्रवेश उत्सव के संग ही प्रदेश के प्राथमिक स्कूल परिसर मन म 6 हजार 536 बालवाड़ी मन ल घलोक शुरू करे गीस।
मुख्यमंत्री श्री बघेल ह छत्तीसगढ़ महतारी अऊ मालिक आत्मानंद के फोटू म मार्ल्यापण करके कार्यक्रम के शुभारंभ करिन। उमन ये बेरा म नवप्रवेशी लइका मन ल तिलक लगाके, मिठाई खवाके मुंह मीठा कराइन। लइका मन ल स्कूल बस्ता, पुस्तक अऊ गणवेश के वितरण करिन। उमन लइका मन ले कहिन कि खूब मन लगाके पढ़यं अऊ पढ़े के संग ही खेल-कूद म घलोक हिस्सा लेवयं। कार्यक्रम म महात्मा गांधी के आदर्श उपर आधारित स्कूल मन म लगवईया पोस्टर के विमोचन घलोक करे गीस। मुख्यमंत्री श्री भूपेश बघेल ये मौका म फेर से खोले जात स्कूल के पालक अऊ लइका मन ले ऑनलाइन सीधा बात करिन। उमन अधिकारी मन ले कहिन कि नक्सल प्रभावित क्षेत्र मन म फेर से शुरू होवत स्कूल मन के भवन बनाए म समय लगही, जेखर सेती ए मन ल उहां प्री-फ्रेब्रिकेटेट स्ट्रक्चर ले बनाए जाए।