मुख्यमंत्री ह बगिया म करिन तीन विद्युत केन्द्र के लोकार्पण

जशपुर, 26 सितंबर 2024। मुख्यमंत्री श्री विष्णु देव साय ह जशपुर जिला के ग्राम बगिया म 8.55 करोड़ रूपिया के विकास काम मन के लोकार्पण करिन। ये मां कुंजारा, ढोकड़ा अऊ साहीडांड म नव-निर्मित विद्युत उपकेन्द्र सामिल हे। ए तीनों 33/11 के. व्ही. विद्युत उपकेन्द्र के लागत 7.84 करोड़ रूपिया हे। एखर अलावा मुख्यमंत्री ह कुनकुरी म उप क्षेत्रीय भंडार अऊ सन्ना म बने नवा तहसील कार्यालय भवन के घलोक लोकार्पण करिन।

कुनकुरी अंचल म तीन विद्युत उपकेंद्र बने ले गाव मन के मनखे मन ल विद्युत के आपूर्ति म अवइया दिक्कत ले निजात मिलही। एखर से कुनकुरी अऊ तीर-तखार के 70 गांव मन म 11 हजार उपभोक्त मन ल गुणवत्तापूर्ण विद्युत के आपूर्ति सुनिश्चित होही। उहें सन्ना म नवा तहसील कार्यालय भवन के निर्माण ले राजस्व के मामला मन के निराकरण म तेजी आही।

छत्तीसगढ़ राज्य विद्युत वितरण कंपनी के अधिकारी मन ह बताइन के ग्राम दोकड़ा के विद्युत उपकेन्द्र ले 25 गांव 3500 ले जादा उपभोक्ता, कुंजारा के उपकेन्द्र ले 23 गांव के लगभग 3850 उपभोक्ता अऊ साहीडांड के उपकेन्द्र ले 22 गांव के 4270 उपभोक्ता मन ल गुणवत्ता सहित विद्युत आपूर्ति होवत हे। तीनों विद्युत उपकेन्द्र म 3.15 एम.व्ही.ए. के पॉवर ट्रान्सफॉर्मर लगाए गए हे।

अइसनहे कुनकुरी म उप क्षेत्रीय भंडार स्थापित होए ले ट्रान्सफॉर्मर संग आन विद्युत उपकरण के आपूर्ति म आसानी होही। पहिली 150 ले 200 कि.मी. दूर सूरजपुर जिला म स्थित क्षेत्रीय भंडार, बिश्रामपुर ले ट्रान्सफॉर्मर के आपूर्ति होत रहिस। जेमां जादा समय अउ लागत लगत रहिस। कुनकुरी म मिनी डिपो स्टोर खुले ले दूरी अउ समय बांचे के संग विद्युत सामान मिले म सुविधा होही।

कार्यक्रम म जिला पंचायत उपाध्यक्ष श्री उपेन्द्र यादव, श्री भरत सिंह, पूर्व विधायक श्री रोहित साय, डीडीसी श्री सालिक साय, श्री भुनेश्वर सिंह केशर, श्री अमन शर्मा, श्री रामदेव कायता, ठाकुर पुरुषोत्तम सिंह संग स्थानीय जनप्रतिनिधि अउ बड़ संख्या म ग्रामीणजन उपस्थित रहिन।