सरगुजा, 23 अप्रैल 2020। छत्तीसगढ़ के गांव-गांव म अब फसल के सिंचाई के उन्नत तकनीक के नजारा दिखे लगे हे। किसान अब सिंचाई के उन्नत पद्धति ल अपनाके कम लागत म बेहतर खेती अऊ जादा मुनाफा कमाए लगे हें। ड्रिप अऊ स्प्रिंकलर सिंचाई ल किसान मन ल भाए लगे हे। कम पानी म जादा रकबा के सिंचाई ले खेती-किसानी के रकबा अऊ फसल उत्पादन बाढ़े हे। सिंचाई के ये उन्नत तकनीक ल अपनाए बर राज्य शासन ह किसान मन ल प्रेरित अऊ प्रोत्साहित करे जात हे। ड्रिप अऊ स्प्रिंकलर लगाय बर किसान मन ल रियायत घलोक देहे जात हे।
छत्तीसगढ़ राज्य के मैदानी अंचल के संगें-संग सुदूर वनांचल के गांव म घलोक खेत मन के सिंचाई बर ये उन्नत तकनीक के नजारा देखे जा सकत हे। सरगुजा जिला के अइसनहे एक गांव हे ग्राम बांसझाल, जिहां कई किसान मन ह ड्रिप इरीगेशन तकनीक ल अपना के कम पानी म बेहतर खेती करे ले उत्पादन के संगें-संग इंकर आमदनी बाढ़े हे। ग्राम बांसझाल के किसान मदनगोपाल घलोक ड्रिप इरीगेशन सिसटम ले फसल के सिंचाई करत हे। वो बताइस के राज्य सरकार के उद्यानिकी विभाग ले वोखर खेत मन म 70 प्रतिशत अनुदान म सिंचाई बर ड्रिप इरीगेशन सिसटम लगाए गए हे।
वो ह बताइस के ये सिसटम के उपयोग करे म जिहां पानी के बचत होथे उहें एखर से उत्पादन घलोक डेढ ले दू गुना हो जाथे। ये सिसटम ले सिंचाई करके टमाटर के खेती ले ओ ल 6 लाख रूपिया के आमदनी होए हे। श्री मदन गोपाल के कहना हे के गांव के आन किसान मन घलोक ड्रिप सिसटम के उपयोग करत हें।
