मुख्यमंत्री ह इंडिया टुडे ग्रुप के डिजिटल चैनल ‘छत्तीसगढ़ तक’ ल करिस लॉन्च
रायपुर, मुख्यमंत्री श्री भूपेश बघेल ह कहिन कि छत्तीसगढ़ ल विकास के दिशा म नवा पहिचान मिले हे। एखर चर्चा छत्तीसगढ़ के विकास मॉडल के रूप म आज देशभर म होवत हे। हमर सरकार कोति ले संचालित जनकल्याणकारी योजना मन के फलस्वरूप हर वर्ग के मनखे मन म खुशहाली आए हे। ग्रामीण होवय के शहरी क्षेत्र, हर अंचल म रहवईया मनखे मन ल उन्नति के भरपूर अवसर उपलब्ध होए हे, जेखर से उंखर स्थिति मजबूत होए हे।
मुख्यमंत्री श्री बघेल ह आज इंडिया टुडे ग्रुप के नवा डिजिटल चैनल ‘छत्तीसगढ़ तक’ ल लॉन्च करत ये बात कहिन। उमन नवा डिजिटल चैनल के लॉन्च होए म इंडिया टुडे ग्रुप ल बधाई अउ शुभकामना दीन अऊ कहिन कि चैनल के माध्यम ले छत्तीसगढ़ के विकास अऊ कला-संस्कृति आदि गतिविधि मन के बारे म सहजता ले जानकारी मिलत रइही। ये बेरा म मैनेजिंग एडिटर आज तक चैनल इंडिया टुडे ग्रुप-श्री मिलिन्द खांडेकर, श्री विवेक गौर अऊ श्री नीरज गुप्ता आदि उपस्थित रहिन।
मुख्यमंत्री श्री भूपेश बघेल आज संझा राजधानी के एक निजी होटल म इंडिया टुडे ग्रुप कोति ले आयोजित ‘छत्तीसगढ़ तक बैठक’ कार्यक्रम ल सम्बोधित करत रहिन। उमन इंडिया टुडे ग्रुप ले परिचर्चा के समय कहिन कि छत्तीसगढ़ के समन्वित विकास बर महात्मा गांधी के बताए रद्दा के अनुसरण करत सुराजी गांव योजना के बेहतर ढंग ले संचालन करे जात हे। जेखर गांव, गरीब, किसान, मजदूर संग सबो वर्ग ल भरपूर लाभ मिलत हे। उमन बताइन कि गोधन न्याय योजना के तहत गांव मन ल उत्पादन के केन्द्र बनाए, गांव-गांव म महात्मा गांधी ग्रामीण औद्योगिक पार्क खोले जात हे। एखर से गांव वाले मन ल सुगमता ले रोजगार के अवसर उपलब्ध होवत हे अऊ ओ मन ल बेहतर आमदनी घलोक होए लगे हे। एकर से गांव-गांव के विकास के संग ओ मन ल स्वावलंबी बनाए के काम करे जात हे।
मुख्यमंत्री श्री बघेल ह ये बेरा म सुरता देवाईन कि छत्तीसगढ़ म ग्रामीण अंचल के संगें-संग शहरी क्षेत्र के विकास म घलोक पूरा ध्यान देहे जात हे। एकर से हमर सरकार कोति ले चलाए जात जनकल्याणकारी योजना अऊ कार्यक्रम मन ले हर अंचल अऊ क्षेत्र के मनखे मन ल आगू बढ़े बर बेहतर मौका मिले हे। उमन ये बेरा म जनहित उपर संचालित कई ठन योजना मन, राजीव गांधी किसान न्याय योजना, गोधन न्याय योजना अऊ राजीव गांधी ग्रामीण भूमिहीन कृषि मजदूर न्याय योजना आदि कार्यक्रम के बात करत कहिन कि एखर से समाज के खासकर किसान, मजदूर, महिला, आदिवासी अऊ युवा वर्ग अऊ गरीब अऊ कमजोर वर्ग संग सबो वर्ग के मनखे मन के भलाई अऊ उत्थान के काम होवत हे।
