भारतीय-अमेरिकी उद्यमी मन ह छत्तीसगढ़ म निवेश बर देखाईन उत्सुकता

  • मुख्यमंत्री श्री भूपेश बघेल ह सेन फ्रांसिस्को म निवेशक मन के सवाल मन के दीन जवाब
  • प्रदेश म निवेश के संभावना अऊ बेहतर अवसर मन के जानकारी दीन

रायपुर, 13 फरवरी 2020। छत्तीसगढ़ के मुख्यमंत्री श्री भूपेश बघेल ह अमेरिका प्रवास के दूसर दिन सेन फ्रांसिस्को के इंडिया कम्युनिटी सेंटर, सेनजोस म टाई (द इंडयूस आन्ट्रप्रनर) सिलिकॉन वैली कोति ले आयोजित सम्मेलन म भारतीय समुदाय के मनखे मन के संग चर्चा करिन। इहां भारतीय-अमेरिकी निवेशक मन ह मुख्यमंत्री श्री बघेल ले बातचीत के समय छत्तीसगढ़ के कई क्षेत्र मन म निवेश करे म गहिर दिलचस्पी दिखाए हें।

श्री बघेल ह इहां करीबन 250 निवेशक मन ल संबोधित करत प्रदेश म निवेश के संभावना अऊ अवसर मन के जानकारी देवत ओ मन ल आमंत्रित करिन। ए दौरान उमन नाचा (छत्तीसगढ़ एसोसिएशन ऑफ नॉर्थ अमेरिका) के सदस्य मन ले घलोक मुलाकात करिन।

इंडिया कम्युनिटी सेंटर म चर्चा के समय श्री बघेल ह प्रदेश के विनिर्माण इकाइ अऊ उत्कृष्ट शैक्षणिक संस्थान मन के बारे म बताइन। उमन जानकारी दीन कि छत्तीसगढ़ ल ‘ईज ऑफ डूइंग बिजनेस’ बर भारत म शीर्ष राज्य मन म स्थान दे गए हे अऊ कहिन कि छत्तीसगढ़ निवेश करे बर सबले अच्छा जगा हे काबर के ये केंद्र म स्थित हे अऊ इहां बेहतर कनेक्टिविटी हे। उमन कहिन कि राज्य के नवा औद्योगिक नीति निवेशक मन बर अड़बड़ अनुकूल हे। उमन ये घलोक बताइन कि रोजगार सृजन, पोषण आदि म ध्यान देहे ले आदिवासी मन के सरकार के प्रति विश्वास बढ़े हे, जेखर परिणामस्वरूप नक्सल आंदोलन म कमी आए हे। उमन उल्लेख करिन कि आदिवासी क्षेत्र मन म हाट बाजार म मोबाइल क्लीनिक मन ले स्वास्थ्य सुविधा मन म अड़बड़ सुधार होय हे। ये दौरान श्री बघेल ह अपन प्रतिनिधिमंडल के संग दुनिया के सबले बड़े डेटा सेंटर कंपनी इक्विनिक्स के घलोक भ्रमण करिन।

लउछरहा..