भारतीय कुष्ठ निवारण संघ सोंठी कात्रेनगर के करिन दउरा
मध्य क्षेत्र स्तरीय खेलकूद प्रतियोगिता के करिन शुभारंभ
जांजगीर-चाम्पा, 01 सितंबर 2024। राजस्व मंत्री श्री टंक राम वर्मा ह काली जांजगीर-चाम्पा जिला के भारतीय कुष्ठ निवारण संघ सोंठी आश्रम कात्रेनगर के दउरा करिन अउ सरस्वती शिशुमंदिर चांपा म विधाभारती मध्य क्षेत्र स्तरीय खेलकूद प्रतियोगिता के शुभारंभ करिन। उमन भारतीय कुष्ठ निवारण संघ कात्रेनगर म आयोजित कार्यक्रम ल संबोधित करत कहिन के कुछ दशक पहिली मनखे मन कुष्ठ ल एक छूत के बीमारी समझत रहिन। मनखे कुष्ठ रोगी मन ले शारीरिक अउ सामाजिक दूरी बनाके रहत रहिन। अभी हाल म ये भेदभाव कम होत जात हे। शासन ह इनकर उत्थान बर हर संभव प्रयास करत। कुष्ठ निवारण संघ कात्रेनगर कोति ले कुष्ठ पीड़ित मन के निःस्वार्थ सेवा हम सब बर प्रेरणा पुंज हे। कुष्ठ रोगी मन के सेवा नारायण सेवा के समान हे।
मंत्री श्री वर्मा भारतीय कुष्ठ निवारण संघ परिसर के भ्रमण करत जरूरतमंद कुष्ठ रोगी मन ल ट्राईसाइकिल के वितरण करिन अऊ रक्षा सूत्र बांधत के फल तको बांटिन। कुष्ठ आश्रम सोंठी कात्रेनगर म बनाये जात जीवनोपयोगी कई ठन हस्त उत्पाद मन के उमन सराहना करिन। कुष्ठ आश्रम सोंठी के सदस्य मन ह आश्रम म बाउंड्रीबाल निर्माण करे के बात रखीन जऊन ल मंत्री श्री टंकराम ह संबंधित अधिकारी मन ल जरूरी कार्यवाही करे निर्देश दीन। एखर पाछू मंत्री श्री वर्मा ह सरस्वती शिशु मंदिर चाम्पा म आयोजित विद्याभारती मध्य क्षेत्र स्तरीय खेलकूद प्रतियोगिता के शुभारंभ करिन अऊ खिलाड़ी मन के मनोबल बढ़ाइन।
ए बेरा म सांसद श्रीमती कमलेश जांगड़े, जनप्रतिनिधि अउ संस्था के प्रबंधकारिणी संग गणमान्य नागरिक मौजूद रहिन।
