मुख्यमंत्री ह पूर्व प्रधानमंत्री श्रीमती इंदिरा गांधी ल उंखर जयंती म करिन नमन
रायपुर, 18 नवम्बर 2020। मुख्यमंत्री श्री भूपेश बघेल ह पूर्व प्रधानमंत्री श्रीमती इंदिरा गांधी के जयंती 19 नवम्बर बर ओ मन ल नमन करे हें। मुख्यमंत्री ह श्रीमती गांधी के देश के प्रति योगदान ल सुरता करत कहिन के श्रीमती इंदिरा गांधी ह आजीवन गरीब अऊ समाज के कमजोर वर्ग के उत्थान बर उदीम करिन अऊ देश के एकता अऊ अखण्डता के रक्षा बर अपन जीवन न्यौछावर कर दीन। उमन देश के तरक्की बर बहुत अकन कड़ा फैसले लीन। ओ मन ल आयरन लेडी के नाम ले घलोक जाने जाथे।
श्री बघेल ह कहिन के श्रीमती गांधी ह दूरदृष्टि अऊ पक्का इरादा के संग देश ल नवा दिशा प्रदान करिन। चुनौतीपूर्ण परिस्थिति मन म देश के कुशलतापूर्वक नेतृत्व करत अंतर्राष्ट्रीय पटल म भारत ल प्रतिष्ठापूर्ण स्थान देवाइन। ऊंखर हरित क्रांति कार्यक्रम के सफलता ह देश ल खाद्यान्न उत्पादन म आत्मनिर्भर बनाइस। श्री बघेल ह कहिन के श्रीमती इंदिरा गांधी बचपन ले देश के स्वतंत्रता संग्राम म सक्रिय रहिन। उमन बाल चरखा संघ के स्थापना करिन अऊ असहयोग आंदोलन के समय लइका मन के वानर सेना बनाइन। प्रधानमंत्री के रुप म उमन बैंक मन के राष्ट्रीयकरण, राजा मन के प्रीवीपर्स के समाप्ति जइसे कठोर निर्णय लीन। बांग्लादेश के उदय, भारत के परमाणु शक्ति संपन्न राष्ट्र बनना उंखर प्रमुख उपलब्धि रहिस। ऊंखर कार्यकाल म भारतीय अंतरिक्ष अनुसंधान संगठन के स्थापना होइस अऊ पहिली उपग्रह आर्यभट्ट अंतरिक्ष म छोड़े गीस।
