मुख्यमंत्री ह पूर्व प्रधानमंत्री श्रीमती इंदिरा गांधी ल उंखर पुण्य तिथि म दीन विनम्र श्रद्धांजलि
रायपुर, मुख्यमंत्री श्री भूपेश बघेल ह 31 अकटूबर के दिन पूर्व प्रधानमंत्री श्रीमती इंदिरा गांधी के पुण्य तिथि म ओ मन ल विनम्र श्रद्धांजलि अर्पित करे हें। मुख्यमंत्री ह कहिन हे कि श्रीमती इंदिरा गांधी ह आजीवन गरीब अऊ समाज के कमजोर वर्ग मन के उत्थान बर उदीम करिन अऊ देश के एकता अऊ अखण्डता के रक्षा बर अपन जीवन न्यौछावर कर दीन। श्रीमती गांधी ह दूरदृष्टि अऊ पक्का इरादा के संग देश ल नवा दिशा प्रदान करिन। चुनौती वाले परिस्थिति मन म देश के सुग्घर नेतृत्व करत अंतर्राष्ट्रीय पटल म भारत ल प्रतिष्ठापूर्ण स्थान देवाइन। ऊंखर हरित क्रांति कार्यक्रम के सफलता ह देश ल खाद्यान्न उत्पादन म आत्मनिर्भर बनाइस। श्रीमती इंदिरा गांधी बचपन ले देश के स्वतंत्रता संग्राम म सक्रिय रहिन। उमन बाल चरखा संघ के स्थापना करिन अऊ असहयोग आंदोलन के समय लइका मन के वानर सेना बनाइन। प्रधानमंत्री के रुप म उमन बैंक मन के राष्ट्रीयकरण, राजा मन के प्रिवीपर्स के समाप्ति जइसे कठोर निर्णय लीन। बांग्लादेश के उदय, भारत के परमाणु शक्ति संपन्न राष्ट्र बनना उंखर प्रमुख उपलब्धि रहिस। ऊंखर कार्यकाल म भारतीय अंतरिक्ष अनुसंधान संगठन के स्थापना होइस अऊ पहिली उपग्रह आर्यभट्ट अंतरिक्ष म छोड़े गीस।