इंदिरा एरोबिक-1 धान के बंफर पैदावार

दंतेवाड़ा, कृषि विज्ञान केन्द्र, दन्तेवाड़ा के प्रक्षेत्र म वरिष्ठ वैज्ञानिक अऊ प्रमुख डॉ. नारायण साहू के मार्गदर्शन अऊ डॉ. भुजेन्द्र कोठारी, प्रक्षेत्र प्रबंधक के निरीक्षण म 10 एकड़ क्षेत्रफल म धान के किसिम इंदिरा एरोबिक-1 के बीज उत्पादन लेहे जात हे। बीज उत्पादन बर धान के नर्सरी 20 जुन के लगाए गए रहिस। जेखर रोपाई मुख्य खेत मन म 15-20 जुलाई के बीच करे गीस। धान के रोपाई लईनवार उचित दुरी म कतार ले कतार के दुरी 20 से.मी. अऊ पौध ले पौध के दूरी 10 से.मी. म करे गीस। अभी हाल म फसल 80 दिन के अवधि म बाली मन के दाना म दुध भर के दाना ठोस होए के अवस्था म हे। ये फसल म खरपतवार नियंत्रण बर 25-30 दिन रोपाई के बाद अंबिका पैडी विडर ले यांत्रिक विधि ले करे गीस। ये किसिम दन्तेवाड़ा म बीज उत्पादन बर पहली पईत लेहे गए हे जेन मध्यम जमीन बर बहुत ही उपयुक्त हे। ये किसिम के विशेषता हे के ये ह मध्यम अवधि 105-120 दिन म पक के तैयार हो जाथे। एखर उत्पादन क्षमता 45-50 क्विंटल प्रति हेक्टेयर होथे। ये किसिम ल कम पानी के जरूरत होथे, नेक ब्लास्ट अऊ सड़न सड़न प्रतिरोधी हे। ये किसिम के धान मध्यम पतला दाना होथे। दन्तेवाडा के परिपेक्ष्य म ये किसिम मध्यम जमीन (टिकरा) म जादा पैदावार बर उपयुक्त हे। ये किसिम के ऊंचाई मध्यम होथे। तना मजबुत होए के सेती तेज हवा म फसल ह गिरे ले बांच जाथे।