रायपुर शहर ले 40 किलोमीटर दूरिहा खरोरा-तिल्दा मार्ग म 555 हेक्टेयर म विकसित करे गए हे सफारी
रायपुर, 18 नवम्बर 2020। पूर्व प्रधानमंत्री श्रीमती इंदिरा गांधी के जयंती के अवसर म काली 19 नवंबर के प्रदेशवासी मन ल ’इंदिरा प्रियदर्शिनी नेचर सफारी मोहरेंगा’ के रूप म एक अऊ पर्यटन स्थल के सौगात मिलही। मुख्यमंत्री श्री भूपेश बघेल अपन निवास कार्यालय ले वीडियो कॉन्फ्रेंसिंग के संग नेचर सफारी के लोकार्पण करहीं। वन विभाग ह राजधानी रायपुर ले करीबन 40 किलोमीटर दूरिहा खरोरा-तिल्दा मार्ग म स्थित मोहरेंगा वन क्षेत्र म 555.850 हेक्टेयर म ये सुग्घर नेचर सफारी विकसित करे हे।
वन मंत्री श्री मोहम्मद अकबर के बताती ’इंदिरा प्रियदर्शिनी नेचर सफारी मोहरेंगा’ के हरियर जंगल म साजा, खैर, तेंदू, सेमहा, चार, बेल, धावड़ा, आंवला, बर, अमली, मउहा, काउहा अऊ बांस प्रजाति के पेड़ हे। ये क्षेत्र म वन्य प्राणी मन बर चार तालाब तको बनवाए गए हे। संगेच नेचर सफारी म चार मंजिला वॉच टावर, पैगोडा, बायोडायवर्सिटी हॉल अऊ भव्य प्रवेश द्वार के संग पर्यटक मन बर जरूरी सुविधा विकसित करे गए हे। सफारी घूमे बर जिप्सी के व्यवस्था विभाग कोति ले करे गए हे, जेमां पर्यटक नेचर सफारी के आनंद ले सकहीं। नेचर सफारी के जंगल म पर्यटक प्राकृतिक परिवेश म 30 ले 40 प्रजाति के चिरई मन के संग चीतल, जंगली सुअर, खरगोश, सियार, लोमड़ी, बन्दर, नेवला, अजगर आदि वन्यप्राणी मन, ल घलव देख सकहीं। ये सफारी म औषधीय पौधा घलोक लगाए गए हे।
