रायपुर, 08 फरवरी 2020। मुख्यमंत्री श्री भूपेश बघेल ह सुकरवार के दिन नवा रायपुर के मेफेयर लेक रिसॉर्ट म सीएनबीसी अवाज कोति ले आयोजित सीईओ अवार्ड कार्यक्रम म देश के कई ठन उद्योग, सेवा मन के क्षेत्र म उत्कृष्ट काम करइया सीईओ ल चिनहा देके सम्मानित करिस। कार्यक्रम म श्री बघेल ह कहिन कि छत्तीसगढ़ के जऊन क्षेत्र मन म उद्योग नइ हे वो क्षेत्र मन म उद्योग लगइया ल रियायत दीए जाही। उमन कहिन कि छत्तीसगढ़ के 44 प्रतिशत क्षेत्र म जंगल हे। इहां प्रचूर मात्रा म खनिज, कोयला, बिजली, पानी अऊ मानव श्रम उपलब्ध हे। छत्तीसगढ़ के बैलाडीला ले देश-विदेश म आयरन के पूर्ति होथे। देश के विकास म छत्तीसगढ़ के अहम योगदान रहे हे।
मुख्यमंत्री श्री बघेल ह कहिन कि छत्तीसगढ़ म नवा उद्योग नीति लागू करे गए हे। जेमां उद्योग मन ल बहुत अकन सुविधा दीए गए हे। उद्योग नीति बनाए बर उद्योगपति मन ले घलोक राय लेहे गए रहिस अऊ उंखर कोति ले आए अच्छा सुझाव मन ल नीति म सामिल करे गए हे। मुख्यमंत्री ह कहिन कि छत्तीसगढ़ म फूड प्रोसेंसिंग उपर आधारित उद्योग लगाए जात हे। इहां चाय अऊ कॉफी के घलोक उत्पादन होवत हे। राज्य के सबो क्षेत्र मन म आवागमन के सुविधा विकसित हो गए हे। इहां के संस्कृति अऊ परम्परा समृद्ध हे। इहां सबो क्षेत्र मन म सद्भावना के वातावरण हे। राज्य सरकार के नीति मन के सेती इहां मंदी के कोनो असर नइ हे। बेरोजगारी कम हो गए हे। जेम-ज्वेलरी म 85 प्रतिशत तक विकास होए हे। इहां प्रचूर मात्रा म अन्न उत्पादन होथे। राज्य म धान ले इथेनॉल बनाए के कार्ययोजना के प्रस्ताव केन्द्र तीर विचाराधीन हे। अनुमति मिले म उत्पादन शुरू करे जाही। मुख्यमंत्री ह कहिन कि छत्तीसगढ़ म कुपोषण ले मुक्ति बर अभियान चलाए जात हे। मलेरिया अऊ डायरिया के रोकथाम बर अभियान जारी हे।
