वाणिज्य-उद्योग मंत्री श्री लखमा ह नारायणपुर जिला के विकास कार्य मन के समीक्षा करिन

नारायणपुर, 28 जून 2021। प्रदेश के वाणिज्य, उद्योग मंत्री अउर नारायणपुर जिला के प्रभारी मंत्री श्री कवासी लखमा ह आज जिला पंचायत नारायणपुर के सभाकक्ष म विभागीय कार्य मन के समीक्षा करिन। उमन कहिन कि शासन के योजना मन के क्रियान्वयन म कोनो प्रकार के लापरवाही बर्दाश्त नइ करे जाए। उमन कहिन कि राज्य सरकार कोति ले बहुत अकन योजना मन के संचालन करे जात हे। एमां नरवा, गरवा, घुरूवा अऊ बाड़ी योजना के अंतर्गत जिला म स्थापित गौठान मन म गठित महिला स्व सहायता समूह मन कोति ले सबो प्रकार के आर्थिक गतिविधि मन के संचालन करे जाए। एखर तहत् मुर्गीपालन, सब्जी उत्पादन, पशुपालन, वर्मी कम्पोस्ट उत्पादन संग आन सबो प्रकार के आयमूलक गतिविधि मन के संचालन करे जाए। राजीव गांधी किसान न्याय योजना के तहत धान के स्थान म आन फसल लेहे बर राज्य शासन कोति ले बढ़ावा देहे जात हे। जिला के किसान मन ल ये योजना ले जादा ले जादा जोड़े जाय। एखर से मनखे मन के आमदनी घलोक बाढ़ही। मंत्री श्री लखमा ह समीक्षा के समय कहिन कि अभी हाल म पूरा देश कोविड-19 ले जूझत हे। एखर तीसर लहर ले निपटे बर स्वास्थ्य विभाग कोति ले एखर उपचार बर बेहतर व्यवस्था करे जाये। जिला म आईसीयू वार्ड, वेंटिलेटर, आक्सीजन सिलेण्डर, अऊ बहुत संख्या म बिस्तर मन के व्यवस्था करे जाये। जिला के हर नागरिक ल बेहतर स्वास्थ्य सुविधा प्रदान करे जाये।