रायगढ़ के 549 पंचायत मन म क्यूआर कोड सुविधा शुरू

अब नइ लगय पंचायत के चक्कर एक किलिक ले मिलही मनरेगा के पांच साल के जानकारी
रायगढ़, छत्तीसगढ़ म केंद्र सरकार के मनरेगा योजना के प्रभावी क्रियान्वयन जारी हे। ग्रामीण क्षेत्र मन म विकास बर ये योजना मील के पत्थर साबित होवत हे। छत्तीसगढ़ के रायगढ़ जिला म ए योजना ल जादा पारदर्शी अऊ प्रभावी ढंग ले संचालित करे बर नवा पहल करे जात हे। जिला के सबो 549 पंचायत मन म क्यूआर कोड आधारित नवा प्रणाली शुरू करे गए हे, जेखर जरिए ग्रामीण अपन गांव म पाछू पांच बछर म स्वीकृत व्यक्तिगत अऊ सामुदायिक काम मन के जानकारी तुरंत प्राप्त कर सकहीं। स्मार्टफोन ले क्यूआर कोड स्कैन करतेच काम के विवरण, व्यय अऊ प्रगति जइसे सूचना मन उपलब्ध होही।
रायगढ़ जिला म मनरेगा बर ये पहल केंद्र सरकार के डिजिटल इंडिया अऊ राज्य सरकार के पारदर्शिता नीति के हिस्सा हे। एकर उद्देश्य गांव वाले मन ल विकास के प्रक्रिया म सक्रिय भागीदार बनाना अऊ योजना मन के निगरानी के अधिकार देना हे। अब गांव वाले मन ल जानकारी बर न तो पंचायत कार्यालय के चक्कर लगाय ल परय अऊ न ही अधूरा सूचना उपर निर्भर रहना परय।
सितंबर ले रायगढ़, खरसिया, पुसौर, घरघोड़ा, लैलूंगा, तमनार अऊ धरमजयगढ़ ब्लॉक के सबो पंचायत मन म क्यूआर कोड लगाए जात हे। ये प्रणाली समय अऊ श्रम के बचत करही, संगेच गांव वाले मन ल तकनीकी रूप ले सशक्त घलोक बनाही। पंचायत स्तर म प्रशिक्षण कार्यक्रम आयोजित करे जात हे ताकि जादा ले जादा मनखे क्यूआर कोड के उपयोग कर सकंय।