रायपुर, 26 अक्टूबर 2020। छत्तीसगढ़ म खेल अधोसंरचना मन ल विकसित करे के राज्य सरकार के उदीम ल एक अऊ बड़का सफलता मिले हे। छत्तीसगढ़ राज्य म खेल अधोसंरचना मन के विकास म एक अऊ नवा अध्याय जुड़ गए हे। मुख्यमंत्री श्री भूपेश बघेल के विशेष पहल म भारत सरकार के युवा कल्याण अऊ खेल मंत्रालय कोति ले खेलो इंडिया योजना के तहत अम्बिकापुर म मल्टीपरपज इंडोर हॉल के निर्माण अऊ महासमुन्द म सिंथेटिक एथलेटिक ट्रेक निर्माण के राज्य सरकार के प्रस्ताव ल मंजूरी दे देहे गए हे। ये दुनों प्रस्ताव छत्तीसगढ़ सरकार खेल अऊ युवा कल्याण संचालनालय ह भारत सरकार ल भेजे रहिस।
मुख्यमंत्री श्री भूपेश बघेल अऊ खेल मंत्री श्री उमेश पटेल के विशेष प्रयास ले भारत सरकार ह अम्बिकापुर म मल्टीपरपज इंडोर हॉल के निर्माण बर 4 करोड़ 50 लाख रूपिया अऊ महासमुन्द म सिंथेटिक एथलेटिक ट्रेक के निर्माण बर 6 करोड़ 60 लाख रुपए के प्रशासकीय स्वीकृति जारी कर देहे हे। एखर बर मुख्यमंत्री श्री भूपेश बघेल अऊ खेल मंत्री श्री उमेश पटेल ह हर्ष व्यक्त करत प्रदेश के खिलाड़ी अऊ खेल विभाग के अधिकारी मन अऊ कर्मचारी मन ल बधाई देहे हें। मुख्यमंत्री श्री भूपेश बघेल ह कहिन के राज्य के खिलाड़ी मन ल बेहतर ले बेहतर सुविधा उपलब्ध कराए बर राज्य सरकार सरलग बडे़ कदम उठावत हे। छत्तीसगढ़ के खिलाड़ी मन बर अंतर्राष्ट्रीय मापदण्ड के मुताबिक खेल अधोसंरचना मन के निर्माण करे जात हे।