रायपुर, 9 मई 2020। मुख्यमंत्री श्री भूपेश बघेल अउ कृषि मंत्री श्री रविन्द्र चौबे के मार्गदर्शन म कृषि विभाग कोति ले किसान मन ल अकतहा आय सुनिश्चित करे के उद्देश्य ले खेत मन के मेड़ मन म दलहन अऊ तिलहन के फसल के खेती ल बढ़ावा देहे के विशेष अभियान शुरू करे जात हे। पायलट प्रोजेक्ट के रूप म मेड़ मन म दलहन अऊ तिलहन के खेती बर राज्य के 10 जिला चुने गए हे, जेमां बालोद, दुर्ग, बेमेतरा, कबीरधाम, धमतरी, बलौदाबाजार, मुंगेली, बिलासपुर, जांजगीर-चांपा अऊ रायगढ़ सामिल हे। ए सबो 10 जिला मन म विशेष अभियान चलाके शत-प्रतिशत खेत मन के मेड़ म अरहर अउ आन दलहनी, तिलहनी फसल के उत्पादन करे जाही।
कृषि उत्पादन आयुक्त श्रीमती मनिन्दर कौर द्विवेदी ह कृषि विभाग के अधिकारी मन ल खेत के मन के मेड़ म दलहन अऊ तिलहन के खेती बर किसान मन ल प्रेरित अउ प्रोत्साहित करे के संगेच ओ मन ल जरूरी मार्गदर्शन घलोक देहे ल कहे हें। कृषि उत्पादन आयुक्त ह एखर बर किसान मन ल जरूरत मुताबिक उन्नत किस्म के बीज के उपलब्धता अउ आन जरूरी व्यवस्था घलोक ठउका करे के हुकुम देहे हें। संचालक कृषि ह सबो जिला के उप संचालक कृषि ल मेड़ म दलहनी अउ तिलहनी फसल के उत्पादन के संबंध म विस्तृत दिशा-निर्देश जारी करे हे।
