सीएम के धर्मपत्नी श्रीमती कौशल्या साय ह व्हील चेयर दे के सुनीन उंखर समस्या
मानकुवेर नाग अऊ वोखर परिवार ह मुख्यमंत्री के जताइस आभार
रायपुर, 19 सितमबर 2024। मुख्यमंत्री श्री विष्णु देव साय के संवेदनशील पहल ले बगिया म स्थापित मुख्यमंत्री कैंप कार्यालय ह मनखे मन के मदद करे के सिलसिला सरलग चलावत हे। इही कड़ी म पैरालिसिस बीमारी ले जूझत बगीचा तहसील के महादेवडांड टुकुपानी निवासी श्रीमती मानकुवेर नाग चले-फिरे म असमर्थ रहस। ओ ल मुख्यमंत्री कैंप कार्यालय ले व्हील चेयर प्रदान करे गीस। पैरालिसिस बीमारी ले पीड़ित श्रीमती मानकुवेर नाग के परिजन ह सीएम कैंप कार्यालय बगिया पहुंचके मदद बर आवेदन करे रहिस। परिवार के ए अपील ल गंभीरता ले लेत मुख्यमंत्री के निर्देश म तुरंत कार्रवाई करे गीस।
मुख्यमंत्री के धर्मपत्नी श्रीमती कौशल्या साय ह पीड़ित परिवार ले मुलाकात करके उंखर समस्या सुनीन अऊ ओ मन ल व्हील चेयर प्रदान करिन। उमन परिवार ल हरसंभव मदद देहे के आश्वासन घलोक दीन। ए सहायता ले मानकुवेर नाग अऊ ऊंखर परिजन के चेहरा म खुशी दिखीस। श्रीमती मानकुवेर नाग ह कहिस के व्हील चेयर मिले ले अब ओ अपन दैनिक काम मन ल आसानी ले कर पाही। परिवार ह मुख्यमंत्री श्री विष्णुदेव साय अऊ उंखर धर्मपत्नी के प्रति अपन आभार व्यक्त करिस अऊ कहिन कि ए मदद ले ऊंखर जीवन म एक नवा आशा अऊ राहत आए हे।
