राजनांदगांव म होवत स्कूल शिक्षा के नवाचार ल भारत सरकार के नीति आयोग ह सहराईस
राजनांदगांव, 24 अक्टूबर 2020। भारत शासन के नीति अयोग ह छत्तीसगढ़ के आकांक्षी जिला राजनांदगांव म पढ़ई तुंहर दुआर के तहत नवाचार के माध्यम ले लइका मन के शिक्षा बर करे जात प्रभावी काम मन ल सहराए हें। नीति आयोग ह अपन ट्विटर अकाउन्ट म ए काम मन ल रेखांकित करत ट्वीट करे हे के राजनांदगांव जिला के दूरस्थ ग्रामीण क्षेत्र मन म लइका मन शिक्षा के आनंद ले वंचित नइ हें। लइका मन के उज्ज्वल भविष्य बर कोविड-19 संक्रमण के कठिन परिस्थिति म घलोक दूरस्थ अंचल मन तक शिक्षा के रोशनी पहुंचत हे। एखर से लइका मन के पढ़ाई म कोनो बाधा नइ आत हे।
कलेक्टर श्री टोपेश्वर वर्मा के मार्गदर्शन म जिला स्तरीय शिक्षा विभाग के टीम बेहतरीन काम करत हे। ये टीम जिला के सबो नौ विकासखंड मन ले बेहतर समन्वय स्थापित करके कई माध्यम ले लइका मन ल सुरक्षित अऊ सतत अध्यापन सुनिश्चित करवात हे, जेखर परिणामस्वरूप जिला के सुदूर वनांचल क्षेत्र मन म घलोक शिक्षक अऊ शिक्षा सारथी मन ह सरलग प्रयास करत पढ़ई के कमान थामे रखे हे। मोहल्ला क्लास, बुल्टू के बोल अऊ सोशल मीडिया के प्रयोग करत लइका मन के शिक्षा बर नवाचार कर उंखर पढ़ाई जारी रखे गए हे। जानबा हे के जिला के सुदूर वनांचल क्षेत्र मोहला विकासखंड म शिक्षक मन ह शिक्षा के क्षेत्र म प्रेरणादायक अऊ अनुकरणीय नवाचार करत स्थानीय जनसमुदाय, जनप्रतिनिधि अऊ अपन खुद के उदीम ले 276 स्मार्ट टीवी लेहे हें इऊ पारा-मोहल्ला म डिजीटल पढ़ई करवावत हें जेकर से शिक्षा के प्रति लइका मन के रूचि म बढ़ोतरी होवत हे।
