आत्मनिर्भरता के मिसाल बनिस श्रीमती शशिकला खलखो

समूह ले जुड़के बनाइस पहिचान अऊ बनिस महिला सशक्तिकरण के प्रेरणा
जशपुर, मुख्यमंत्री श्री विष्णु देव साय के गृह जिला जशपुर के ग्रामीण महिला मन आत्मनिर्भरता के दिशा म नवा आयाम स्थापित करत हें। जिला के कांसाबेल विकासखंड अंतर्गत ग्राम केनाडाड़ के श्रीमती शशिकला खलखो ह बिहान योजना के माध्यम ले स्वावलंबन के मिसाल पेश करे हे। एक सामान्य गृहिणी ले सफल उद्यमी बने के ओखर ये सफर आन महिला मन बर घलोक प्रेरणास्रोत हे।
श्रीमती शशिकला खलखो साल 2008 ले “जीवन ज्योति स्व-सहायता समूह” के सक्रिय सदस्य हे। 11 सदस्यीय ए समूह के माध्यम ले उमन सामूहिक खेती-किसानी के काम मन म सहभागिता करत अपन आर्थिक स्थिति ल सुदृढ़ करत हें। बिहान योजना ले जुड़े के बाद ऊंखर जीवन म बदलाव आइस, उमन लइका मन के शिक्षा के संगे-संग अपन आप ल आर्थिक रूप ले स्वावलंबी बनाइन। अपन उद्यमशीलता ल विस्तार देवत हाले म वो ह होटल व्यवसाय चालू करिस। एखर बर ओ ल मुद्रा योजना के अंतर्गत करजा अऊ सामुदायिक निवेश निधि (सीआईएफ) मद ले 60 हजार रूपिया के सहायता मिलिस। उमन बताइन के होटल संचालन के ये नवा शुरुआत ऊंखर बर उत्साहजनक रहे हे अऊ प्रारंभिक महिना म ही ओ मन ल बनेच आय प्राप्त होगए हे।
श्रीमती खलखो पहिली खाद्य विभाग के अंतर्गत सार्वजनिक वितरण प्रणाली (पीडीएस) के दुकान के संचालन घलोक करत रहिस हे। ए ले अकतहा ओ ल प्रधानमंत्री आवास योजना के तहत पक्का घर, महतारी वंदना योजना के अंतर्गत मासिक 1000 रूपिया के आर्थिक सहायता अऊ उज्ज्वला योजना के अंतर्गत गैस कनेक्शन के सुविधा प्राप्त होए हे। श्रीमती शशिकला खलखो ह अपन सफलता के श्रेय राज्य सरकार के महिला सशक्तिकरण योजना मन ल देवत मुख्यमंत्री श्री विष्णु देव साय के प्रति विशेष आभार व्यक्त करे हे। वो ह कहिस के शासन के योजना मन ह ओ मन ल आत्मनिर्भर बने के अवसर देहे हे अऊ अब ओ ह आन महिला मन ल घलोक प्रेरित करत हे।