ऐश्वर्या के पढ़ई के रद्दा अब होही अऊ आसान

सामाजिक संगठन ह तकनीकी शिक्षा बर प्रतिभाशाली छात्रा ल दीस लेपटाप
धमतरी, संकल्प, समर्पण अऊ सहयोग जब एक संग मिलथे, त कोनो के ज़िंदगी बदल सकत हे। अइसनहेच प्रेरणादायक उदाहरण आज धमतरी म देखे ल मिलीस, जब एक ग़रीब फेर प्रतिभाशाली छात्रा ऐश्वर्या गंगबेर ल ओखर पढ़ाई ल सरलग बनाए रखे खातिर एक लैपटॉप देहे गीस।
ऐश्वर्या गंगबेर एक ग़रीब परिवार ले हे, फेर कठिन परिस्थिति के बावजूद वो ह शिक्षा ल अपन लक्ष्य बनाए हे। अभी हाल म वो रुद्री स्थित भोपालराव पवार पॉलिटेक्निक कॉलेज म सिविल इंजीनियरिंग के दूसरइया साल के छात्रा हे। ऐश्वर्या के पिता मूर्ति बनाए के काम करथे। वो ह कइसनहो अपन बेटी के पढ़ाई के खरचा उठावत हे। फेर, तकनीकी शिक्षा के ए दौर म लैपटॉप जइसे जरूरी संसाधन के कमी ऐश्वर्या के पढ़ाई म बाधा बनत रहिस।
जब ये बात जनदर्शन कार्यक्रम म कलेक्टर के संज्ञान म आईस, त वो ह छात्रा के मदद बर तत्परता देखाइस। ‘साथी समूह’ के माध्यम ले समाज सेवी मन ह छात्रा के मदद बर हाथ आगू बढ़ाइन। काली सोमवार के कलेक्टर के उपस्थिति म साथी समूह के सक्रिय सदस्य श्री आकाश कटारिया, श्री अंकित लाठ अऊ श्री निश्चल बोहरा के सहयोग ले ऐश्वर्या ल एक नवा लैपटॉप देहे गीस। ये केवल एक इलेक्ट्रॉनिक उपकरण न ही, बल्कि ऐश्वर्या के सपना ल उड़ान देहे के माध्यम बनिस।
ये पहल केवल एक छात्रा के मदद भर नो हे, बल्कि ये सामाजिक सहयोग, मानवीय संवेदना अऊ शिक्षा के प्रति हमार दायित्व के जीता-जागता उदाहरण हे। अइसन सामाजिक प्रयास ले हर प्रतिभा ल ओखर हक मिल सकत हे।’ ए अवसर म कलेक्टर ह कहिन के अइसन होनहार लइका मन ल आगू बढ़ाए के जिम्मेदारी केवल शासन के नइ हे, भलुक समाज के हर सक्षम मनखे के घलोक हे। उमन कहिन के ‘‘प्रतिभा संसाधन मन के मोहताज नइ होवय, बस सही समय म थोकन सहारा मिले ले बड़का उड़ान भरे जा सकत हे।
साथी समूह के सदस्य मन ह घलोक भरोसा देवाइन के भविष्य म घलोक ओ मन जरूरतमंद लइका मन के सहायता बर तत्पर रइहीं। ऐश्वर्या अऊ ओखर परिवार ह ए सहयोग बर कलेक्टर अऊ सबो दानदाता मन के प्रति आभार व्यक्त करे हें।