करहीबाजार स्वास्थ्य केंद्र म हर महीना लक्ष्य ले पाँच गुना जादा प्रसव
जनवरी ले अब तक 129 सफल प्रसव
बलौदाबाजार, 22 सितंबर 2024। मुंख्यमंत्री श्री विष्णु देव साय के मार्गदर्शन अउ स्वास्थ्य मंत्री श्री श्याम बिहारी जायसवाल के विशेष उदीम ले स्वास्थ्य केन्द्र मन ले स्वास्थ्य सेवा मन के विस्तार ले संस्थागत प्रसव म बेहतर प्रदर्शन होवत हे। बलौदाबाजार भाटापारा विकासखंड के ग्राम पंचायत करहीबाजार म स्थित आयुष्मान आरोग्य मंदिर म ए साल जनवरी ले लेके अब तक 129 प्रसव होए हे जेन औसतन 16 प्रतिमाह हे। जबकि लक्ष्य 3 प्रतिमाह के हे। ए प्रकार ले करहीबाजार स्वास्थ्य केंद्र म प्रतिमाह लक्ष्य ले पाँच गुना जादा प्रसव होवत हे। जेन शासकीय संस्था मन के प्रति मनखे मन के विश्वास ल देखाथे। आयुष्मान आरोग्य मंदिर म पाछू दिन होए एक प्रसव म चार किग्रा के शिशु वाले गर्भवती महिला ग्राम केशला निवासी 26 वर्षीय श्रीमती पितर पटेल के सामान्य प्रसव कराए गीस। वोखर पति हरकुमार पटेल ह बताइस के वो कृषि मजदूरी करथे अऊ पत्नी के ये तीसरइया लइका हे। बीच म जरूरी जांच होए रहिस अऊ हम एक निजी अस्पताल घलोक गे रहेन। फेर करहीबाजार के स्वास्थ्य केंद्र म संपर्क करेन जेमां स्वास्थ्य कार्यकर्ता ह जरूरी दवई अऊ सलाह दीस अउ समय-समय म हम जांच बर जात रहेन। प्रसव के बाद अब जच्चा लइका दुनों स्वस्थ हे।
ए संबध म भाटापारा के खंड चिकित्सा अधिकारी डॉ राजेन्द्र माहेश्वरी ह बताइस के लइका के वजन जादा होए के सेती प्रसव के समय जादा रक्तस्राव,पेल्विक विकृति, गर्भाशय के नीचे सरके के खतरा हो सकत हे। अइसन म स्वास्थ्य केंद्र म सामान्य प्रसव एक उपलब्धि हे जेखर से परिजन के कोनो संभावित परेशानी ले घलोक बचाव होइस। इही स्वास्थ्य केंद्र म शकुन बंजारे अऊ विक्रम शर्मा ग्रामीण स्वास्थ्य संयोजक अऊ आशा दिवाकर सामुदायिक स्वास्थ्य अधीकारी के रूप म अपन सेवा देवत हें।
जानबा हे के कलेक्टर दीपक सोनी के निर्देश म जिला प्रशासन ह नागरिक मन ल आयुष्मान आरोग्य मंदिर म ही प्रसव के सुविधा प्रदान करे अऊ संस्थागत प्रसव ल बढ़ाए के उद्देश्य ले जिला खनिज न्यास निधि ले कई केंद्र मन म स्वास्थ्य कार्यकर्ता मन के नियुक्ति करे हें जेखर अच्छा परिणाम मिलत हे।
