नामांतरण अऊ सीमांकन संग सबो राजस्व प्रकरण मन के निराकरण समय-सीमा म करे के निर्देश
अतिवृष्टि अउ अल्पवृष्टि ले फसल क्षति के मामला मन म किसान मन ल राहत राशि देवाए म संवेदनशीलता ले करव काम
कलेक्टर अऊ कमिश्नर नियमित रूप ले करव तहसील मन के जांच
भ्रष्टाचार के मामला म होवय सख्त कार्यवाही
रायपुर, मुख्यमंत्री श्री भूपेश बघेल ह कलेक्टर कॉन्फ्रेंस के दूसर दिन राजस्व विभाग के काम-काज के विस्तृत समीक्षा करिन। उमन राजस्व विभाग के ढीला-ढाला काम-काज उपर उपर नाराजगी व्यक्त करिन अऊ कलेक्टर मन ले कहिन कि राजस्व के काम-काज चुस्त-दुरूस्त होना चाही। राजस्व विभाग के अधिकारी-कर्मचारी अपन कार्यशैली म बदलाव लावयं। मनखे मन के काम समय-सीमा के भीतर होना चाही। कलेक्टर अऊ कमिश्नर नियमित रूप ले तहसील के काम मन के निरीक्षण करव। अतिवृष्टि अउ अल्पवृष्टि ले फसल क्षति के समीक्षा करत सबो कलेक्टर मन ल संवेदनशीलता के संग प्रभावित किसान मन ल समय सीमा म आरबीसी 6(4) अंतर्गत राहत राशि देवाए के उमन निर्देश दीन।
राजस्व विभाग के समीक्षा म मुख्यमंत्री ह कहिन कि नामांतरण के लंबित प्रकरण मन के समय सीमा म निराकरण होना चाही। सबो राजस्व प्रकरण मन ल समय सीमा म निपटावयं। नागरिक मन ल राजस्व प्रकरण मन म देरी ले परेशानी नइ होना चाही। नागरिक मन के काम ल समय सीमा म नइ करे म अधिकारी मन ल कड़क चेतावनी देवत उमन कहिन कि भ्रष्टाचार के शिकायत पाए जाय म सख्त कार्रवाई करे जाही। उमन राजस्व आय के प्राप्ति मन म घलोक विशेष ध्यान देहे के निर्देश दीन।
बैठक म मुख्य सचिव श्री अमिताभ जैन, अपर मुख्य सचिव श्री सुब्रत साहू, श्रीमती रेणु जी. पिल्ले, पीसीसीएफ श्री संजय शुक्ला संग सबो संभागों के राजस्व कमिश्नर, जिला मन के कलेक्टर संग कई ठन विभाग मन के वरिष्ठ अधिकारी उपस्थित रहिन।