घर के छत म लगे मोबाइल टावर हटाए के हुकुम

बेलासपुर, 26 मई 2024। जुन्ना बस स्टैंड तीर महुआ काम्प्लेक्स म जियो कंपनी के एक मोबाइल टावर जर्जर भवन के छत म कई बछर ले खड़े हे। अनहोनी ल देखत भवन मालिक ह नगर निगम ल चिट्ठी लिखके एला हटाए के मांग करे हे। नगर निगम आयुक्त ह घलोक एला गंभीरता ले लेत कंपनी ल टावर हटाए के आदेश देहे हे। महुआ काम्प्लेक्स के मालिक राजेश कुमार बजाज ह खतरा ल देखत नगर निगम आयुक्त ल 26 फरवरी 2024 के चिट्ठी लिखके भवन के जर्जर होए के सेती छत म लगे मोबाइल टावर ल हटाए के मांग करे रहिस। मकान मालिक के कहना हे के छत के संगेच मकान के भिथिया तको कमजोर हो गए हे। ते पाए के छत अब टावर के वजन ल नइ सह सकत ये। टावर ला कहूं समय म नइ हटाए गीस, त गंभीर हादसा हो सकत हे।