- गर्मी के सेती तालाब मन के कम होवत हे जल स्तर
- जल संसाधन विभाग ल तुरंते प्रक्रिया चालू करे के हुकुम
रायपुर, 15 अप्रैल 2020। प्रदेश के गांव के तालाब मन म गरमी के दिन म निस्तार बर पानी के कमी हो जाथे ये बात ल धियान म रखत मुख्यमंत्री श्री भूपेश बघेल ह जलाशय मन ले निस्तारी तालाब मन ल भरे बर पानी छोड़े के प्रक्रिया तुरंते चालू करे के हुकुम देहे हें।
श्री बघेल ह एखर बर जल संसाधन विभाग ल हुकुम देत कहे हें के अभी हाल म दिनो-दिन तापमान म बढ़ोतरी होवत हे, गांव म कई जगा निस्तार बर तालाब मन म पानी के कमी होए हे। हर बरछर जइसे ये साल घलोक ग्रामीण क्षेत्र म निस्तारी के समस्या ल दूर करे बर जलाशय मन ले तालाब मन बर पानी छोड़े के प्रक्रिया तुरंत चालू करे जाना जरूरी हे। मुख्यमंत्री ह जल संसाधन विभाग के अधिकारी मन ल ये बात के विशेष ध्यान रखे के हुकुम देहे हें के जलप्रदाय के समय पानी के व्यर्थ अपव्यय झन होवय। उमन लॉकडाउन के अभी हाल के परिस्थिति मन ल ध्यान म रखत कोरोना वायरस के प्रसार ल रोके बर सोशल डिस्टेंसिग संग सबो सावधानी अउ सुरक्षा हुकुम मन के पालन करत निस्तारी तालाब मन ल भरे बर जरूरी प्रबंध करे ल कहे हें।
