- कोरोना संकट के बाद घलोक किसान मन के हित मन के नइ होवय अनदेखी- मुख्यमंत्री दाऊ भूपेश बघेल
- खरीफ़ बर खाद- बीज के व्यवस्था म जुटिस सरकार
- सहकारी समितिय मन म तेजी ले होवत हे खातू अऊ बिजहा के भंडारण
रईपुर, 12 मई 2021। मुख्यमंत्री श्री भूपेश बघेल ह कहिन हे के कोरोना संकट के बाद घलोक राज्य के किसान मन के हित के अनदेखी अऊ उंखर जरूरत मन ल पूरा करे म कोनो प्रकार के कमी नइ आन देहे जाए। खरीफ सीजन 2021 ल ध्यान म रखत राज्य सरकार किसान मन के मांग के मुताबिक न सिरिफ खाद अऊ बीज के व्यवस्था म जुट गए हे, भलुक लऊहे इंकर भंडारण समिति मन म कराना शुरू कर देहे हे। खरीफ बर खातू अऊ बिजहा के मांग ल देखत अब तक समिति मन म करीबन 45 फीसद खातू अऊ 25 फीसद प्रमाणित बीजहा के भंडारण करा देहे गए हे। खातू अऊ बिजहा के भंडारण के ये उदीम सरलग चलत रइही। किसान भाई समिति मन ले अपन जरूरत के मुताबिक खातू अऊ बिजहा के उठाव कर सकहीं।
मुख्यमंत्री ह कहिन के खरीफ 2021 के तियारी बर किसान मन ल पइसा के जरूरत परही। एला ध्यान म रखत राज्य सरकार ह किसान मन ल राजीव गांधी किसान न्याय योजना के तहत अवईया 21 मई के कृषि आदान सहायता के रूप म पहली किस्त के राशि ऊंखर खाता मन म अंतरित करही, जेखर से किसान भाई मन खेत के तैयारी के संगे-संग अपन आन किसानी काम ल पूरा कर सकहीं।
कृषि मंत्री श्री रविंद्र चौबे ह बताइस के खरीफ़ 2021 बर राज्य म कई प्रकार के बीज मन के 9 लाख 52 हज़ार 500 क्विंटल मांग ल देखत अब तक 6 लाख 87 हजार 32 क्विंटल प्रमाणित पैक्ड बीज के उपलब्धता सुनिश्चित कर लेहे गए हे, जेमां ले 2 लाख 33 हजार 423 क्विंटल बीज के भंडारण समिति मन म करा देहे गए हे। समिति मन म भंडारित बीज के मात्रा कुल मांग के 25 फीसद हे। उमन बताइन के राज्य म खरीफ 2021 सीजन बर कई प्रकार के रासायनिक खातू के लक्ष्य 11 लाख 75 हजार मैट्रिक टन निरधारित हे, जेखर आगू म 5 लाख 25 हजार 528 टन खातू के भंडारण कराए जा चुके हे, जेमा 2लाख 21 हजार 885 टन यूरिया , 90हजार 402 टन डीएपी, 39 हजार 314 टन एनपी, एक लाख 8हज़ार 522 टन सिंगल सुपर फास्फेट के भंडारण सामिल हे। किसान समिति मन ले अब तक 22 हज़ार 940 मैट्रिक टन खाद के अग्रिम उठाव घलोक कर डरे हें।