सिंगापुर म छत्तीसगढ़ राज्य लघु वनोपज संघ संग जगदलपुर अऊ कोरबा के दू महिला स्व-सहायता समूह होहीं पुरस्कृत
छत्तीसगढ़ ल लघु वनोपज प्रोसेसिंग के क्षेत्र म उत्कृष्ट काम बर मिलही ग्रिट अवार्ड
सिंगापुर म पुरस्कार ग्रहण करे रायपुर ले दल रवाना
मुख्यमंत्री श्री बघेल अऊ वन मंत्री श्री अकबर ह दीन बधाई
रायपुर, छत्तीसगढ़ ल लघु वनोपज प्रोसेसिंग के क्षेत्र म अंतर्राष्ट्रीय स्तर म एक महत्वपूर्ण उपलब्धि हासिल होए हे। एखर तहत छत्तीसगढ़ ल संधारणीय विकास, गरीबी उन्मूलन अऊ महिला सशक्तिकरण बर अंतर्राष्ट्रीय पुरस्कार मिलही। ये मा पुरस्कार ग्रहण करे काली 20 जुलाई के माना विमानतल रायपुर ले दल रवाना होइस।
सिंगापुर म अवईया 22 अऊ 23 जुलाई के आयोजित ईएसजी ग्रिट पुरस्कार समारोह म छत्तीसगढ़ राज्य लघु वनोपज संघ संग जगदलपुर अऊ कोरबा के दू महिला स्व-सहायता समूह पुरस्कृत होही। छत्तीसगढ़ राज्य बने के बाद ये पहलइया अवसर ये, जब महिला स्व-सहायता समूह के सदस्य एक अंतर्राष्ट्रीय प्रतिष्ठित पुरस्कार प्राप्त करे बर विदेश यात्रा म जात हें।
सिंगापुर बर भरे ये उड़ान उंखर आकांक्षा अऊ सपना के ऊंच उड़ान ये। बकावंड वन धन केन्द्र के सदस्य सुश्री पद्मिनी बघेल अऊ सुश्री बेलाबाई कश्यप अऊ डोंगानाला वनधन केन्द्र के सदस्य सुश्री सरोज पटेल अऊ सुश्री फूलबाई नेती के विमान ल एक बड़का भीड़ ह जब हाथ हला के रवाना करिस, त पूरा छत्तीसगढ़ अऊ विशेषकर कोरबा अऊ बस्तर जिला मन म हर्ष के लहर दौड़ गीस। वन धन विकास के सदस्य मन के ये उड़ान, अइसन सैकड़ों महिला अऊ वनवासी मन के आशा के उड़ान ये।
मुख्यमंत्री श्री भूपेश बघेल के पहल म वन मंत्री श्री मोहम्मद अकबर के सियानी म छत्तीसगढ़ राज्य लघु वनोपज संघ के वन धन विकास केन्द्र मन म लघु वनोपज के प्रसंस्करण काम म लगे महिला सदस्य मन के समर्पित कार्य प्रणाली के फल ये कि ये अंतर्राष्ट्रीय पुरस्कार बर उंखर चिन्हारी होए हे। छत्तीसगढ़ के ये महत्वपूर्ण उपलब्धि बर मुख्यमंत्री श्री बघेल अऊ वन मंत्री श्री अकबर ह राज्य लघु वनोपज संघ संग वनधन केन्द्र मन के समूह मन ल बधाई अऊ शुभकामना देहे हें।
खुशी ले भरे छत्तीसगढ़ के ये वनवासी प्रतिनिधि 150 देश के 200 ले जादा प्रतिनिधि मन के आगू ये पुरस्कार ग्रहण करत, छत्तीसगढ़ मॉडल अऊ सतत् विकास के कहानी घलोक सुनाहीं। ये समारोह म पूरा दुनिया के व्यवसायी, बैंकर्स, इनवेस्टर्स, पर्यावरणविद अऊ शासकीय प्रतिनिधि मन के उपस्थिति म ‘छत्तीसगढ़-हर्बल्स’ के पूरा दुनिया म पहिचान ठउका कराहीं। एखर से लघु वनोपज आधारित उद्योग ल बढ़ावा मिलही। ‘छत्तीसगढ़ मॉडल’ ल पूरा विश्व म सतत् विकास के मॉडल के रूप म पहिचान मिलही।
छत्तीसगढ़ राज्य लघु वनोपज संघ के ये दल के सियानी राज्य लघु वनोपज संघ के प्रबंध संचालक श्री संजय शुक्ला करत हें अऊ अपर प्रबंध संचालक श्री बी. आनंद बाबू अउ वनमंडल अधिकारी सुश्री स्टायलो मण्डावी सहयोग बर दल म संघरे हें। ये सात झन के दल के सिंगापुर एयरपोर्ट म कार्पस्टेज सिंगापुर के डॉ. निशा कोहली करिन जाही, जेन ये आयोजन के प्रमुख यें।